Jesu naakali mung’anda yamujulu abasikwiiya bakwe, wakababuzya kuti: ‘Mubusiku oobuno, moonse muyoondichija.’ Pesi Petro wakati: ‘Mebo tandikakusiyi pe nikuba kuti aaba boonse bakuchija.’ Nikuba boobo, Jesu wakabuzya Petro kuti: ‘Mukuku kawutanalila, uyoowamba kuti tundizi pe kwaziindi zyotatwe.’

Baapostolo baJesu bakachija chiindi basilumamba nibakatola Jesu kung’anda yaKkefasi. Pesi babili bakatobela. Umwi wakali Petro. Wakayinka mulubuwa lwang’anda yaKkefasi mpawo wakayota mulilo. Nibakali kuyota mulilo, umwi mubelesi musimbi wakabona Petro mpawo wakati: ‘Iwe ndakuziba! Mwalaamwi aJesu!’

Petro wakati: ‘Teetwalaamwi pe! Alimwi nsizi kuti ulikwaambaanzi!’ Mpawo Petro wakalulama kugedi kuti azwe. Pesi, umwi mubelesi musimbi wakabona Petro, mpawo wakabuzya bantu kuti: ‘Mwaalumi ooyu walikweenda aJesu!’ Pesi Petro wakati: ‘Jesu ngulikwaamba, tandimuzi pe!’ Alubo, umwi mwaalumi wakati: ‘Uli mweenzinyina waJesu! Nkaambo mulaka wako ulamvwika kuti uzwa kuGalilaya mbuli Jesu.’ Pesi Petro wakakonka kati: ‘Nsimuzi pe muntu ooyo nguwamba!’

Muchiindi eecho, mukuku wakalila. Petro wakabona Jesu kali kumucheba. Wakayeeya majwi aJesu, mpawo wakazwa aanze wakulila loko.

Kuchiindi eechi, Nkuta Mpati yamaJuda yakabungana kuti izoobeteke Jesu mung’anda yaKkefasi. Bakali bapanga kale kumujaya Jesu, pesi bakali kumuyandwida mulandu. Pesi bakakachilwa. Kumamanino, Kkefasi wakabuzya Jesu kuti: ‘Uli Mwana waLeza na?’ Jesu wakati: ‘Iiyi.’ Mpawo Kkefasi wakati: ‘Taakwe bumwi bumboni mbutuyanda. Ooku nkusampawula Leza!’ Basinkuta bakati: ‘Oyu mwaalumi weelede kujayigwa.’ Bakamuuma Jesu, bakamuswida  mate, bakamuvumba kumeso, akwaamba kuti: ‘Ikuti kuli musinsimi, mwaambe wakuuma.’

Nibwakacha, bakatola Jesu kuNkuta Mpati yamaJuda, akumubuzya kuti: ‘Uli Mwana waLeza na?’ Jesu wakasandula kuti: ‘Ndinywe muli kwaamba oobo.’ Bakamujanina mulandu wakusampawula Leza mpawo bakamutola kunkuta yaPontiyo Pilato, mweendelezi wamaRoma. Atubone zyakachitika kuzwa waawo.