Yesu obwakaba ali n’abakwenda be ha kiihuro, akabagambira ati: ‘Kiro kinu inywena nimwija kwiruka mugende munsige nyenka.’ Petero akagarukamu ati: ‘Hatali nyowe! Abandi boona n’obu barairuka bakakuleka, nyowe tindikuleka.’ Baitu Yesu akagambira Petero ati: ‘Enkoko etakakookere, noija kunyehakana emirundi esatu ngu tommanyire.’

Abaserikale obu batwaire Yesu omu nju ya Kayafa, abakwenda be abarukukira obwingi bakairuka. Baitu babiri bakahondera ekitebe ekyali nikwatara Yesu. Omu hali bo akaba ali Petero. Akagenda omu zigati ya Kayafa kandi yagenda ha murro kwota. Omu kyererezi ky’omurro, omuzaana akarora Petero hanyuma yagamba ati: ‘Nkumanyire! Naiwe oikaire na Yesu!’

Petero akamugarukamu ati: ‘Nangwa! Eby’orukubaza timbimanyire!’ Akarugaho yagenda haihi n’omulyango. Baitu kandi omuzaana ondi akamurora hanyuma yagambira ekitebe ky’abantu ati: ‘Omusaija onu nauwe abairege na Yesu.’ Petero akagarukamu ati: ‘Yesu timumanyire!’ Hanyuma omusaija ondi akagamba: ‘Naiwe oli omu hali bo! Nimanyira ha mulingo orukubazaamu, noruga Galiraya nka Yesu.’ Baitu Petero akarahira yagamba ati: ‘Timumanyire!’

Omu kaire ako konyini, enkoko ekakooka, kandi Yesu yahinduka yarora Petero. Petero akaijuka ebigambo bya Yesu, yaturuka yagenda kurra.

Hanyuma, hakabaho orukurato orw’okucwera Yesu omusango orukaba ruli omu nju ya Kayafa. Bakaba bamazire ira kucwamu kwita Yesu baitu hati baali nibaserra ensonga ey’okwekwasa. Baitu batazoole ekintu kyona eky’okumujunaana. Hakumalirra Kayafa akakaguza Yesu ati: ‘Oli Mwana wa Ruhanga?’ Yesu akamugarukamu ati: ‘Ego.’ Kayafa akagamba ati: ‘Titukyaine obwakaiso bundi obuturukuserra. Ajumire Ruhanga!’ Orukurato rukaikiriza rwagamba: ‘Omusaija ogu asemeriire kufa.’ Bakateera Yesu empi, bamucwera ebicwanta, bamusweka amaiso  bamutera entomi nibagamba: ‘Obworaaba oli nabbi, tugambire ow’akutiire!’

Obubwakiire, Yesu bakamugarra omu kisiika eky’orukurato kandi bayongera bamukaguza: ‘Oli Mwana wa Ruhanga?’ Yesu abagarukamu ati: ‘Inywe nimugamba ngu ndi Mwana wa Ruhanga.’ Hanyuma, bakamucwera omusango nibagamba ngu najuma Ruhanga kandi bamutwara hali omulemi Omurumi arukwetwa Pontio Pirato. Kiki ekyahondireho? Katurole.