Сөөлгү кежээки чемниң үезинде Иисус элчиннеринге: «Бо дүне мени кааптар силер» — дээн. Ынчалза-даа Пётр: «Чүгле мен эвес! Сени шупту кааптар-даа болза, мен сени кажан-даа кагбас мен!» — дээн. Ынчалзажок Иисус аңаа: «Аскыр дагаа алгырыптары билек, мени танывас мен деп, менден үш катап ойталаар сен» — дээн.

Дайынчылар Иисусту Каиафаже аппаарга, элчиннер шупту дезип чорупкан. Оларның чүгле ийизи чоннуң соондан чоруп орган. Оларның бирээзи Пётр турган. Ол Каиафаның бажыңының хериминче киргеш, одаг чанынга чыннып олурган. Одагның чырыынга бир херээжен чалча Пётрну танып кааш: «Сен Иисус-биле турдуң!» — деп чугаалаан.

Пётр аңаа: «Ол мен эвес-тир мен! Чүнү чугаалап турарыңны билбейн тур мен!» — дээш, хаалгаже халып чорупкан. Аңаа база бир херээжен чалча ону көрүп кааш, хөй улуска: «Бо кижи Иисус-биле кады турган!» — дээн. Пётр: «Мен ону танывас мен!» — деп алгырган. Оон бир кижи тургаш: «Сен оларның бирээзи-дир сен! Иисус ышкаш, Галилея чурттуг деп чугааңдан билдингир чүве-дир» — дээн. Ынчалза-даа Пётр: «Мен ол кижини билбес мен!» — деп даңгыраглаан.

Ол-ла дораан аскыр дагаа алгырыпкан. Иисус хая көрнүп келгеш, Пётрже көрген. Ынчан Пётр Иисустуң сөстерин сактып келгеш, үне халааш, ишкирнигип ыглап эгелээн.

Ол үеде дээди иудей Чөвүлелдиң кежигүннери Иисусту шиидер дээш, Каиафаның бажыңынга чыглып келген. Олар ону өлүрер чүгле чылдагаан дилеп турган. Ынчалза-даа ону буруудадыптар хире чүү-даа чок болган. Ынчан Каиафа Иисустан дорт айтырган: «Сен Бурганның Оглу сен бе?» Иисус: «Ийе» — деп харыылаан. Каиафа ынчан: «Оон өске бадыткалдарның херээ чүү боор? Бо кижи Бурганны куду көрүп тур!» — дээн. «Бо кижи өлүр ужурлуг» деп,  Чөвүлел шиитпирлээн. Олар Иисусту дажып, олче дүкпүрүп турган. Олар ооң караан шарып алгаш, эттеп-эттеп: «Медээчи болзуңза, сени кым шанчыпты?» — дижип турган.

Дараазында хүн олар Иисусту дээди иудей Чөвүлелче эккелгеш, катап айтырган: «Сен Бурганның Оглу сен бе?» Иисус: «Силер боттарыңар ынча деп тур силер» — деп харыылаан. Оон Бурганның адын баксырадып турар дээш, Иисусту Рим император Понтий Пилатче чоргузупкан. Улаштыр чүү болганын билип аалам.