Musi Yesu e na vhaapostola vhawe kamarani ya nṱha, o vha vhudza uri: ‘Noṱhe ni ḓo ṱuwa na ntsia ndi ndoṱhe vhusiku ha ṋamusi.’ Petro a ri: ‘Hu si nṋe! Naho arali vhaṅwe vhoṱhe vha ni ṱutshela, nṋe ndi nga si vhuye nda ni sia.’ Fhedzi Yesu a vhudza Petro a ri: ‘Musi mukukulume u sa athu lila, ni ḓo ri a ni nḓivhi luraru.’

Musi maswole a tshi dzhia Yesu a mu isa nḓuni ya Kayafa, vhunzhi ha vhaapostola vho shavha. Fhedzi vhavhili vha mu tevhela vhe vhukati ha vhathu vhanzhi. Muṅwe wavho o vha e Petro. O ya muṱani wa tsengo wa nnḓu ya Kayafa nahone a swika a ora mulilo. Tshedza tsha mulilo tsha ita uri muṅwe musidzana a vhone tshifhaṱuwo tsha Petro nahone a ri: ‘Ndi a ni ḓivha! No vha ni na Yesu!’

Petro a ri: ‘Hai, ndo vha ndi si nae! A thi ḓivhi zwine na khou amba nga hazwo!’ A ya getheni. Fhedzi hu si kale muṅwe musidzana a mu vhona nahone a vhudza tshigwada tsha vhathu a ri: ‘Hoyu munna o vha e na Yesu!’ Petro a ri: ‘A thi vhuyi nda mu ḓivha hoyu Yesu!’ Muṅwe munna a ri: ‘Ni muṅwe wavho! Ndi a kona u pfa nga nḓila ine na amba ngayo uri ni bva Galilea, u fana na Yesu.’ Fhedzi Petro a dovha a amba a ri: ‘Nṋe a thi mu ḓivhi!’

Nga tshenetsho tshifhinga, mukukulume wa lila. Petro a vhona Yesu a tshi rembuluwa a mu sedza. A humbula maipfi a Yesu, a bvela nnḓa nahone a lila nga maanḓa.

Nga tshenetsho tshifhinga, khoro ya Sanhedrini ya ṱangana muḓini wa Kayafa uri i sengise Yesu. Vho vha vho no ḓiimisela u vhulaha Yesu, fhedzi zwino vho vha vha tshi khou ṱoḓa tshithu tshine vha nga mu vhea mulandu ngatsho. Fhedzi a vho ngo tshi wana. Kayafa a fheleledza o vhudzisa Yesu nga ho livhaho a ri: ‘Naa ni Ṅwana wa Mudzimu?’ Yesu a ri: ‘Ee.’ Kayafa a ri: ‘A ri tsha ṱoḓa vhuṅwe vhuṱanzi. Hezwi ndi maṱamba!’ Khoro ya tendelana ya ri: ‘Hoyu munna u fanela u vhulawa.’ Vha mbo ḓi rwa Yesu nga mpama, vha mu pfela mare, vha  mu thivha tshifhaṱuwo nahone vha mu rwa, vha ri: ‘Arali ni muporofita ri vhudzeni uri no rwiwa nga nnyi!’

Nga ḓuvha ḽi tevhelaho, vha dzhia Yesu vha mu isa holoni ya Sanhedrini nahone vha dovha vha mu vhudzisa vha ri: ‘Naa ni Ṅwana wa Mudzimu?’ Yesu a fhindula a ri: ‘Ndi vhoiwe ni zwi ambaho.’ Nga zwenezwo vha mu vhona mulandu wa u semana nahone vha mu isa muḓini wa Pontio Pilato, muvhusi wa Roma. Ha itea mini nga murahu ha zwenezwo? Kha ri vhone.