Okathi Yesu aari awe esaala ya osulu ni arummwa awe, aalenle so: ‘Othene anyu munookihiya ohiyu yoola’. Pedru aahimwaakhula so: ‘Nnaari, hata otheene yoohiyakani, miyo nkinoohiyani!’ Vano Yesu aahimuhimeerya wira: ‘Muthupi ohinatthi wiipa, nyuwo munoohimya imaara tthaaru wira khamunkisuwela’.

Okathi yaaphiyale aya anakhotto anvara Yesu ni amuroiha wa Muulupale a anamukuttho Kaifa, arummwa anceene yaahitthyawa. Masi anli a yaawo yaahitthara muttitthi ole. Mmosa a yaawo aari Pedru. Aahirowa mpakha owannyawe Kaifa masi aahihala vate ooraka ni aYuda akina. Ooraka siiso, murumeyi mmosa muthiyana aahinweha Pedru owiitho khumuhimeerya so: ‘Miyo kinnoosuwelani. Nyuwo mwaari ni Yesu!’

Pedru aahikhootta ohimyaka so: ‘Nkinsuwela enihimya anyu!’ Owo aahirowa vamukhora. Masi moohipisa murumeyi mukina muthiyana aahinweha khumwiirela so: ‘Mulopwana ola ari ni Yesu!’ Pedru aahiruna ohimyaka so: ‘Nkinimusuwela Yesu!’ Mulopwana mmosa aahihimya-tho so: ‘Tthiri, nyuwo mwa mmosa a yaawo. Elavulelo anyu enooniherya wira nyuwo mwa muGalileya sintoko Yesu!’ Masi Pedru aahikhootta-tho ohimyaka so: ‘Nkinimusuwela mutthu owo!’

Okathi ene yoowo, muthupi waahiipa. Vano Pedru aahinwehexexa Yesu ni aahuupuwela moolumo a Yesu. Mowaakuveya Pedru aahikhumela vate khupacerya wunla.

Okathi ene yoowo, eSineedrio yaahiiwanana omphukela Yesu owannyawe Kaifa. Awo yaahimpaka palano oomwiiva Yesu, ni yaaniphavelasa mulattu womootherya. Masi hata vari siiso khiyaaphwanya. Wanikisa waya Kaifa aahimukoha Yesu wira: ‘Veekeekhai nyuwo mwa Mwaana a Muluku? Yesu aahaakhula wira: ‘Aayo ka Mwaana a Muluku’. Vano Kaifa aahihimya wira: ‘Ola onveeha Muluku! Khinnaaphavela-tho anamoona!’ Atthu akina yaahihimya-tho wira: ‘Mulopwana ola ophwanenle wiiviwa!’ Awo yaahimmana Yesu mmalakuni, omusenela, yaahimukhuneela  owiitho ni yaanimmana ehimyaka so: ‘Nyuwo, mwaari profeta mmuhimye oomanneni!’

Vaaxiiye aya, aYuda ni atthu akina yaahimukuxa Yesu khumuroiha esaala ya oSineedrio khumukoha-tho wira: ‘Veekeekhai nyuwo mwa Mwaana a Muluku?’ Yesu aahiwaakhula wira: ‘Ti siiso sinihimya anyu, miyo ka Mwaana a Muluku’. Nuumala-vo atthu ale yaahihimya wira Yesu onveeha Muluku ni yaahimuroiha owannyawe Ponsio Pilato, yoowo aari guvernatoro a oRoma. Exeeni yaakhumelenle moottharelana? Nrowe niwehe.