Taminiro taminy efitry tran̈o tan̈abo etazy in̈y, Jesosy nivolan̈a taminy apostoly aby io: ‘Anaro jiaby hiala zaho.’ Ho Petera: ‘Tsy mety zaho han̈ano zen̈y. Ndray iro hiala anao, zaho hiaraka aminao fo.’ Ho Jesosy tamy Petera: ‘Ndray akoho mbala tsy man̈ena, anao intelo hivolan̈a fa tsy mahay zaho.’

Iro maramila aby io koa fa nitondra Jesosy nandeha tamy Kaiafa tan̈y, nilefa marin̈y iro apostoly aby io. Nisy apostoly aroe nan̈araka olo aby io. Petera araiky tamindro io. Niditry tandakorony Kaiafa tao izy, baka io namindro. Nisy tsaiky viavy niasa tao nahita Petera, ke hoizy: ‘Haiko anao! Anao kamaradiny Jesosy.’

Ho Petera: ‘Aha, olo volan̈inao zen̈y tsy haiko!’ Izy baka tio nandeha nan̈aton̈o baro. Nisy piasa hafa koa nahita izy. Ho tsaiky viavy io: ‘Lelahy io niaraka tamy Jesosy!’ Ho Petera: ‘Na olo zen̈y tsy haiko foeky ke!’ Nisy lelahy zay koa nivolan̈a: ‘Ehe e, anao kamaradiny! Ndray fomba fivolan̈anao fo efa ahaizan̈a fa anao baka a Galilia, mira Jesosy mivolan̈a.’ Ho Petera: ‘Tsy haiko foeky izy!’

Tamy zen̈y nisy akoho nan̈ena. Hitany Petera Jesosy nitodiky taminany, ke tsaroany raha nivolan̈iny Jesosy. Petera niboaka nitomoan̈y.

Tamy zen̈y, Fitsaran̈a Ambony Jiosy efa nivory tamy Kaiafa tao, handeha hitsara Jesosy. Iro efa tihamono Jesosy, fa porofo han̈anovan̈a zen̈y fo tavela. Iro ndraiky tsy nahita foeky. Farany Kaiafa foeky nan̈ontany Jesosy: ‘Zanaka Zan̈ahary ankitin̈y ma anao?’ ‘Ia’, ho Jesosy. Kaiafa nivolan̈a: ‘Ino koa raha mbala ambesantsika? Ndray izy man̈asaha Zan̈ahary!’ Fitsaran̈a io amy  zay nan̈aboaka didy fa hivonen̈a Jesosy. Nibadandro masonany, nivangoendro tefantsofin̈y izy, baka io nandrorandro. Ho iro: ‘Anao karaha paminan̈y ke! Azovy namango anao tio?’

Koa fa kiaka andra, nindesindro tamy tran̈o fitsaran̈a tan̈y izy. Iro nan̈ontany izy: ‘Zanaka Zan̈ahary ankitin̈y ma anao?’ Ho Jesosy: ‘Izy volan̈inaro zen̈y.’ Nataondro nan̈asaha Zan̈ahary izy, ke nindesindro tamy Pontio Pilato, governera romanin̈y. Ino eky raha nandalo baka tio? Alo hizavantsika.