Yesu paŵaliji ni ŵandumetume ŵakwe m’cipinda camwinani, jwalakwe ŵasalile kuti, ‘Wosopemwe cimundece jika ciloci.’ Nambo Petulo ŵatite, ‘Une ngasinaleka! Atamose ŵane wosopeŵa ali ŵalesile, Une ngasinaleka wawojo.’ Ni Yesu ŵamsalile Petulo kuti, Tambala mkanatongole, cimciŵeceta kakwana katatu kuti ngamkumanyilila une.’

Asilikali paŵamjawusyaga Yesu kunyumba ja Kayafa, ŵandumetume ŵajinji ŵaliji ali atisile. Nambo ŵaŵili mwa jemanjaji ŵamkuyaga Yesu mulikuga lya ŵanduwo. Jumo mwa ŵaŵiliŵa ŵaliji Petulo. Jwalakwe mpaka ŵajile kwinjila m’luŵala lwakusa lwa nyumba ja Kayafa. Ni jwajotaga moto. Ligongo lya lilanguka lya motowo, msikana jwamasengo ŵam’weni Petulo ni jwatite, ‘Ngummanyilila mmwejo! Mwaliji yalumo ni Yesu!’

Petulo ŵajanjile kuti, ‘Iyayi, nganimba une! Yamkuŵecetayo nganguyimanyilila!’ Jwalakwe jwaŵecetaga yeleyi ali mkwawula kucipata. Nambo kaneko msikana jwine jwamasengo jwam’weni ni jwalisalile likuga lya ŵanduwo kuti, ‘Mundu aju ŵaliji yalumo ni Yesu!’ Nambo Petulo ŵakanile kuti, ‘Une Yesu ngangummanyilila ata panandi!’ Kaneko jwamlume jwine jwatitesoni kuti, ‘Mmweji mli jumo jwa jemanjaji! Kaŵecete kenu kakulosya kuti mkusatyocela ku Galileya mpela Yesuju.’ Nambo Petulo jwalumbilile ŵanduwo kuti, ‘Jwele mundujo une ngangummanyilila!’

Ali mkuŵeceta maloŵega, tambala jwatongwele. Kaneko Petulo ŵam’weni Yesu ali mkumgalawucila ni kumlolecesyaga. Jwalakwe jwakumbucile maloŵe ga Yesu, mwamti jwakopwece pasa ni jwalisile mnope.

Pandaŵi jeleji, nganya ja magambo jasimene m’nyumba ja Kayafa kuti jitande kumjimba magambo Yesu. Nganyaji jaliji jili jikamulene yakum’wulaga Yesu, nambo jasakaga kumpatila magongo gakwe. Nambo nganijipata ligongo lililyose. Pambesi pakwe, Kayafa ŵam’wusisye Yesu kuti, ‘Ana mmwejo mli Mwanace jwa Mlungu?’ Ni Yesu ŵajanjile kuti, ‘Elo.’ Kaneko Kayafa ŵatite, ‘Ngatukusosekwasoni umboni wine. Kweleku kuli kumnyosya Mlungu!’ Nganya jatite, ‘Mundu jweleju akusosekwa kuwa.’ Ni ŵamputile  makofi, kumsunila mata, kumsiŵa m’meso, ni ŵamtimbile kaneko jemanjajo ŵatite, ‘Naga mmwejo mli jwakulocesya, mtusalile jwamtimbile!’

Kuli kucele, ŵamjawisye Yesu ku luŵala lwa magambo ni ŵam’wusisyesoni kuti, ‘Ana mmwejo mli Mwanace jwa Mlungu?’ Yesu ŵajanjile kuti, ‘Jemanja mkuŵeceta jika kuti ndili une.’ Nganyajo jamsimene jwalakwe ni magambo gakuti ali jwakunyosya Mlungu ni ŵamjawisye kwa Pontiyo Pilato juŵaliji jwakulamulila jwa Ciloma. Ana kaneko catendekwe cici? Kwende tulole.