Le tiaʼan Jesús yéetel u apostoloʼob teʼ naj tuʼux tsʼok jaanoʼ, tu yaʼalajtiʼob: ‹Teʼ áakʼabaʼ tuláakleʼex yaan a pʼatkeneʼex›. Pedroeʼ tu núukajtiʼ: ‹Kex tuláakal ka u pʼatechoʼobeʼ, teneʼ mix bikʼin ken in pʼatech›. Chéen baʼaleʼ Jesuseʼ tu yaʼalaj tiʼ Pedro: ‹Táanil tiʼ u kʼaay juntúul tʼeeleʼ, óoxtéen ken a waʼal maʼ a kʼaj óoleniʼ›.

Ka bisaʼab Jesús tumen le soldadoʼob tu yotoch Caifasoʼ, u maas yaʼabil le apostoloʼoboʼ tsʼokaʼaniliʼ u púutsʼloʼobeʼ. Chéen baʼaleʼ kaʼatúuleʼ binoʼob tu paach le yaʼab máakoʼoboʼ. Juntúuleʼ Pedro. Letiʼeʼ ook tu táankabil u yotoch Caifaseʼ ka náatsʼ kʼíich yiknal le kʼáakʼ tʼabaʼanoʼ. Yoʼolal u sáasilil le kʼáakʼoʼ, juntúul x-chʼúupal ku meyaj teʼeloʼ tu yilaj Pedroeʼ ka tu yaʼalajtiʼ: ‹¡Teneʼ in kʼaj óolech! ¡Ka máan kaʼach yéetel Jesús!›.

Pedroeʼ tu núukaj: ‹Maʼ, maʼ jaajiʼ. Maʼ in kʼaj óoliʼ›, ka bin teʼ tuʼux yaan le joonajoʼ. Teʼeloʼ ilaʼab tumen uláakʼ x-chʼúupal ku meyajiʼ, ka tu yaʼalaj tiʼ le máakoʼoboʼ: ‹¡Le máakaʼ u yéet máan Jesús kaʼachi!›. Pedroeʼ tu núukaj: ‹Mix in kʼaj óol máax Jesusiʼ›. Uláakʼ juntúul máakeʼ tu yaʼalajtiʼ: ‹Techeʼ suuk a máan kaʼach yéetel Jesús. Chíikaʼan u yilaʼal galileailech tumen ka tʼaan jeʼex Jesuseʼ›. Pedro túuneʼ tu jurartaj: ‹Maʼ in kʼaj óoliʼ›.

Teʼ súutukoʼ kʼaaynaj juntúul tʼeel. Pedro túuneʼ tu yilaj táan u paktaʼal tumen Jesuseʼ ka kʼaʼajtiʼ le baʼax aʼalaʼantiʼoʼ. Le oʼolal jóokʼeʼ ka sen okʼolnaji.

Le táan u yúuchul lelaʼ, le Sanedrinoʼ u muchʼmuba kaʼach tu yotoch Caifás utiaʼal u juzgartik Jesús. Teʼ Sanedrinoʼ ku táakpajal kaʼach u nuuktakil le judíoʼoboʼ. Tsʼokaʼaniliʼ u chʼaʼtuklikoʼob u kíimskoʼobeʼ, chéen baʼaleʼ maʼ tu kaxtikoʼob baʼax oʼolal u takikoʼob u pool. Tu tsʼookeʼ Caifaseʼ tu kʼáataj tiʼ Jesús: ‹¿U paalech wa Dios?›. Jesuseʼ tu núukaj: ‹Jaaj, teen›. Caifás túuneʼ tu yaʼalaj: ‹Maʼ kʼaʼabéettoʼon uláakʼ baʼal utiaʼal k-takik u pooliʼ. ¡Tsʼoʼok u kʼaakʼastʼaan tu contra Dios!›. Le máaxoʼob yanoʼob teʼ Sanedrinoʼ maʼalob tu yuʼubiloʼobeʼ, ka tu yaʼaloʼob: ‹Le máakaʼ unaj u  kíimsaʼal›. Ka túun tu laʼalajoʼob, tu túuboʼob, tu pixoʼob u yich, tu jaʼajatsʼoʼob ka tu yaʼaloʼobtiʼ: ‹Wa profetaecheʼ, aʼaltoʼon máax jatsʼech›.

Ka sáaschajeʼ, bisaʼab Jesús tu táan le Sanedrinoʼ ka kʼáataʼabtiʼ tu kaʼatéen: ‹¿U Paalech wa Dios?›. Jesuseʼ tu núukajtiʼob: ‹Jaaj, teʼex aʼalik u Paalen Dios›. Ka tsʼoʼokeʼ tu yaʼaloʼob tsʼoʼok u kʼaakʼastʼaan tu contra Dios. Tsʼoʼoleʼ bisaʼab tu palacio Poncio Pilato, u gobernadoril Roma. ¿Baʼax úuch ka tsʼoʼoki? Koʼox ilik teʼ tuláakʼ xookoʼ.