Lulamdog madito gutero Yecu wa i gang kal pa gabuna. Ci Pilato openyogi ni: ‘Koko ango ma wutye kwede i kom laco-ni?’ Gugamo ni: ‘En waco ni ebedo kabaka!’ Pilato openyo Yecu ni: “In i Kabaka pa Lujudaya?” Yecu ogamo ni: “Kerra pe me lobo man.”

I ngeye, Pilato ocwalo Yecu bot Kerode, ma onongo loyo Galilaya, wek onen ka ce en twero nongo lok mo i kome. Kerode onongo pe twero nongo kop mo marac i kom Yecu, pi meno en odwoke cen bot Pilato. Dong, Pilato owaco bot dano ni: ‘An kacel ki Kerode pe wanongo lok mo i kom laco-ni. Abigonye woko.’ Lwak gudange ni: ‘Neke woko! Neke woko!’ Lumony gugoyo Yecu, gungulo laa i kome, dok gudonge. Guketo lalukana okuto i wiye ci gucako nyware kun giwaco ni: ‘Wamoti, Kabaka pa Lujudaya!’ Pilato dok owaco ki lwak ni: ‘An gira pe anongo kop mo i kome.’ Ento gumedde ameda ki dange ni: ‘Gure i kom yat!’ Pi meno Pilato omiye botgi wek gugure.

Gutero Yecu i kabedo ma kilwongo ni Golgota, gigure i kom yat, ci kiilo yatte malo. Yecu olego ni: ‘Aba, timigi kica, pien pe gingeyo gin ma gitye ka timone.’ Dano gubedo ka ngalo Yecu kun giwaco ni: ‘Ka in i Wod pa Lubanga, lor piny ki i kom yat! Larre keni.’

Latim bal mo ma kiguro kangete owacce ni: “Po pira ka ibidonyo i kerri.” Yecu ocikke bote ni: “Wabibedo kwedi i Paradic.” I kine ka cawa abicel, piny ocido woko licuc pi cawa adek. Lupwonnyene mogo gucung cok ki yat ma gigure iye Yecu, kadiwa Maliam, min Yecu. Yecu owaco ki Jon ni ogwok Maliam calo minne kikome.

Lacen, Yecu owaco ni: “Dong otum!” Okulo wiye piny ci oomo yweyone me agikki. I cawa meno kikome, oyengyeng mo magwar oyengo lobo. I ot pa Lubanga, bongo ma poko kin Kabedo Maleng ki Kabedo Maleng Makato Ducu oyec ki malo  opokke woko dul aryo. Ladit ma loyo lumony owacci: ‘Adada, dano man onongo Wod pa Lubanga.’