Dung diboan angka malim kepala Jesus tu jabu ni si Latus, disungkun si Latus ma nasida, ‘Aha do sala ni baoa on?’ Dialusi angka malim kepala i ma, ‘Didok baoa on, raja ibana!’ Disungkun si Latus ma Jesus, “Raja ni halak Jahudi do ho?” Dialusi Jesus ma, “Ndang sian portibi on Harajaonku.”

Dung i, disuru si Latus ma asa diboan Jesus tu si Herodes, pamarenta ni Galilea. Didok roha ni si Latus dapot ni si Herodes ma nian sala ni Jesus. Alai ndang adong sala ni Jesus. Alani i, dipaulak ma muse ibana tu si Latus. Dung i, didok si Latus ma tu angka jolma  i, ‘Ndang adong sala ni baoa on. Bebashononku nama ibana.’ Alai gogo ma didok nasida, ‘Pamate ma ibana! Pamate ma ibana!’ Dicambuk angka tentara i ma Jesus, ditijuri, jala ditinju. Dibahen nasida ma mahkota sian suga-suga tu ulu ni Jesus. Didok nasida ma, ‘Horas raja ni halak Jahudi.’ Dung i didok si Latus ma muse tu nasida, ‘Ndang adong sala ni baoa on.’ Alai gogo ma didok nasida, “Hukum mate ibana tu hau!” Disuru si Latus ma asa dihukum mate Jesus.

Diboan angka tentara i ma Jesus tu Golgata. Dipakkuhon ma Jesus tu hau, dung i dipajongjong ma hau i. Martangiang ma Jesus, ‘Amang, sesa ma dosa ni nasida, ai ndang diboto nasida pambahenan ni nasida i.’ Direhei angka jolma i ma Jesus. Ninna ma, ‘Molo anak ni Debata do ho, palua ma dirim.’

Didok sahalak parjahat na dipakkuhon di lambungna i ma tu Jesus, “Ingot ma ahu molo dung masuk ho tu Harajaonmi.” Didok Jesus ma tu ibana, “Rap do ho dohot ahu di Paradeiso.” Dung arian, golap ma inganan i saleleng tolu jom. Adong do murid ni Jesus na jongjong di lambung ni hau i, termasuk ma si Maria omak ni Jesus. Didok Jesus ma asa diurus si Johannes si Maria jala dibahen songon omakna sandiri.

Ujungna didok Jesus ma, ‘Nunga sae be.’ Dung i mate ma ibana. Tompu ma ro gempa na mansai gogo. Ribak dua ma tirai na adong  di joro di Jerusalem. Gabe didok komandan ni tentara i ma, ‘Tutu do ibana anak ni Debata.’