LIKE SUANLƐ 90
Zezi wuli Gɔlgota lɔ
Ɲanmiɛn ɲrun jranfuɛ mun be su kpɛn mun be fa Zezi ɔli Pilati i awlo lɔ. Pilati usali be kɛ: ‘?Sa tɛ benin yɛ bian nga yoli-ɔ?’ Be tɛli i su kɛ: ‘I waan ɔ ti famiɛn.’ Pilati usali Zezi kɛ: “?Wɔ yɛ a ti Zuifu mun be Famiɛn’n niɔn?” Zezi tɛli i su kɛ: “Min Famiɛn diwlɛ’n nunman mɛn nga nun wa.”
Pilati fɛ i ɔli Erɔdu m’ɔ ti Galile mɛn’n i siefuɛ’n i ja su naan ɔ usɛ i sa, sɛ ɔ kwla wun ndɛ wie i wun-o. Erɔdu wunnin kɛ Zezi w’a yoman sa tɛ fi. Ɔ maan ɔ fɛ i sɛli i sin Pilati ja su. Pilati seli kɛ: ‘E nin Erɔdu y’a wunman sa tɛ kaan sa i wun. Ń má yáci i nun.’ Sran mun be kpan seli kɛ: ‘Kun i! kun i!’ Sonja mun be fali ngble be boli i, be tili be nuan nzue tɛli i wun, yɛ be boli i acɔliɛ. Be fali owieowie wɔli famiɛn kle, kpɛkun be fa wlɛli i ti. Be yoli i finfin, yɛ be seli i kɛ: ‘Zuifu mun be Famiɛn, é yó ɔ like-o.’ Pilati seli ekun kɛ: ‘M’an wunman kɛ bian nga yoli sa tɛ.’ Sran mun be kpan seli kɛ: “Bobo i waka’n su!” Ɔ maan Pilati fali Zezi mannin be naan be ko bobo i waka’n su.
Be fa Zezi ɔli lika kun mɔ be flɛ i Gɔlgota’n. Be boboli i waka kun su, kpɛkun be mannin waka’n su. Zezi srɛli Ɲanmiɛn seli kɛ: ‘Min Si, yaci be wun sa’n cɛ be. Afin be siman like nga be su yo’n.’ Sran mun be srili Zezi, be seli i kɛ: ‘Sɛ a ti Ɲanmiɛn i Wa sakpa’n fin waka’n su jra. De ɔ bɔbɔ wun.’
Sa tɛ yofuɛ nga be boboli be waka su Zezi i wun lɛ’n, be nun kun seli i kɛ: “Sɛ a ju ɔ Famiɛn diwlɛ’n nun lɔ’n, maan ɔ wla kpɛn min su.” Yɛ Zezi seli i kɛ: “E nin wɔ é trán Mɛn klanman’n nun lɔ.” Cɛn sɔ’n nun’n, nnɔsua wia nun’n lika’n luli tuun nvle wunmuan’n su lele dɔ nsan. Zezi i sɔnnzɔnfuɛ wie mun be jinjin waka nga be boboli i su’n i wun koko lɛ. Be nun kun yɛle Zezi i nin Mari. Zezi seli Zan kɛ ɔ nian Mari su kɛ i bɔbɔ i nin sa.
I agualiɛ su’n, Zezi seli kɛ: “I kwlaa i ti w’a yia!” Ɔ kɛnnin i ti ase, yɛ ɔ wuli-ɔ. Kɛ ɔ yoli sɔ’n, asiɛ’n kejeli dan kpa. Ɲanmiɛn i sua’n nun lɔ’n, tannin ng’ɔ o Sua ba ngunmin kun m’ɔ ti Ɲanmiɛn liɛ klonglo’n, ɔ nin Sua ba m’ɔ ti Ɲanmiɛn liɛ klonglo’n be afiɛn’n, i nun kpacili nɲɔn. Sonja mun be su kpɛn kun seli kɛ: ‘Nanwlɛ, bian sɔ’n ti Ɲanmiɛn i Wa sakpa.’
“Maan nda nga Ɲanmiɛn ta be’n be sɔn sɛ’n, sanngɛ Zezi i dunman nun’n, be kwlaa be kpɛn su.”—2 Korɛntifuɛ Mun 1:20.
Ninnge wie mɔ be kwla yo ɔ fɛ ekun'n
ZEZI TI ATIN’N NIN NANWLƐ’N NIN NGUAN’N
Pilati nin Erɔdu be wunnin kɛ Zezi w’a yoman sa tɛ
?Ngue ti yɛ Pilati fali Zezi ko mannin Erɔdu naan ɔ di i jɔlɛ-ɔ? ?Pilati leman atin diman Zezi i jɔlɛ ti-ɔ?
ZEZI TI ATIN’N NIN NANWLƐ’N NIN NGUAN’N
Pilati seli kɛ: “An nian! Bian’n yɛ!”
Pilati bɔbɔ wunnin kɛ Zezi trɛli i awlɛn naan i wla w’a bomɛn i wun.
ZEZI TI ATIN’N NIN NANWLƐ’N NIN NGUAN’N
Be boboli Zezi waka’n su
Zezi tali sa tɛ yofuɛ kun mɔ be su wa kun i wie’n i nda fɛfɛ kun.
ZEZI TI ATIN’N NIN NANWLƐ’N NIN NGUAN’N
“Nanwlɛ, bian sɔ’n ti Ɲanmiɛn i Wa sakpa”
Kɛ Zezi wú’n, lika’n luli, kpɛkun asiɛ’n kejeli. Yɛ tannin dan ng’ɔ o Ɲanmiɛn i sua’n nun lɔ’n i nun kpacili. I kwlaa sɔ’n kle kɛ Zezi ti Ɲanmiɛn i Wa sakpa.
NINNGE CINNJIN NGA BIBLU’N KLE BE’N
?Ngue ti yɛ Zezi wuli ɔ?
Atrɛkpa’n w’a ti i le kɛ e sa tɛ’m be ti ye Zezi wuli-ɔ. ?Sanngɛ tɛ kunngba m’ɔ yili’n ɔ kwla yo sran miliɔn kpanngban be ye?
