Intungulushi sha bashimapepo shatwele Yesu ku ng’anda ya kwa kateka. Pilato abepwishe ati: ‘Mulandu nshi uyu muntu acitile?’ Bayaswike ati: ‘Aletila ni mfumu!’ Pilato aipwishe Yesu ati: “Bushe uli mfumu ya baYuda?” Yesu amwaswike ati: “Ubufumu bwandi te bwa pano isonde.”

Lyena Pilato atumine Yesu kuli Herode, kateka wa Galili, pa kuti amone nga ca kuti Yesu nakwata umulandu. Herode alifililwe ukusanga Yesu no mulandu uuli onse e ico amutumine kuli Pilato na kabili. Lyena Pilato aebele abantu ati: ‘Ine na Herode natufilwa ukusanga umulandu uo uyu muntu acitile. Nalamufumya.’ Abantu bapundile ati: ‘Mwipayeni! Mwipayeni!’ Abashilika balifopawile Yesu, balimufwishiile amate, kabili balimumine. Bamufwikile icisote ca myunga e lyo balemuseka abati: “Mwapoleni, mwe Mfumu ya baYuda!” Na kabili Pilato aebele abantu ati: ‘Nshimusangile no mulandu uyu muntu.’ Lelo balepunda fye ati: “Mupopeleni!” E ico Pilato alibapeele Yesu ukuti bayemwipaya.

Batwele Yesu ku cifulo baleita ati, Golgota, balimupopeele pa cimuti kabili balicimike no kucimika. Yesu alipepele ati: ‘Tata babeleleni uluse, pantu tabeshibe ifyo balecita.’ Abantu baleseka Yesu ati: ‘Nga uli Mwana wa kwa Lesa ikila pa cimuti! Ipusushe.’

Umuntu umo uwali icipondo uo bapopeele mupepi na Yesu amwebele ati: “Mukanjibukishe ilyo mukaba imfumu.” Yesu amulaile ati: “Uli no kuba na ine mu Paradaise.” Mu nshita ya kasuba, kwalifitile pa maawala yatatu. Abasambi bamo baiminine mupepi ne cimuti, pamo na Maria nyina wa kwa Yesu. Yesu aebele Yohane ukulasakamana Maria nga filya fine engasakamana banyina.

Pa kulekelesha, Yesu atile: “Fyonse nomba fyapwa!” Ainamike umutwe aleka no mweo. Ilyo afwile kwali icinkukuma icikalamba. Insalu iyafina iyali mwi tempele iyayakenye Umuputule wa Mushilo  no Muputule wa Mushilo Sana yalilepwike pa kati. Umukalamba wa bashilika alandile ati: ‘Cine cine uyu ali Mwana wa kwa Lesa.’