Avbe ogie ohẹn keghi mu Jesu gha rrie ẹguae ọghe Pailet. Iran ghi sẹ evba, e Pailet keghi nọ iran wẹẹ: ‘De emwi ne okpia na mobọ ru?’ Iran na kha wẹẹ: ‘Ọ wẹẹ ọba ẹre irẹn khin!’ Ẹre Pailet na ghi nọ Jesu wẹẹ: ‘Ọba ọghe Ivbi e Ju ẹre uwẹ khin ra?’ Jesu keghi wanniẹn ọnrẹn wẹẹ: ‘Arriọba mwẹ i re ọghe agbọn na.’

Vbe iyeke ọni, e Pailet na wẹẹ ne iran mu Jesu gha rrie ọghe Hẹrọd ne ọ khaevbisẹ yan e Galili, ne Hẹrọd vbe tobọ re gualọ otọre deghẹ Jesu rriabe. Ugbẹnvbe Hẹrọd ma miẹn abakuru rhọkpa ne Jesu ru, ọ na wẹẹ ne iran werriegbe muẹn gha rrie ọghe Pailet. Ẹre Pailet na tama iran ni mu Jesu rre wẹẹ: ‘Mẹ vbe Hẹrọd ma miẹn emwi rhọkpa ne Jesu ya rriabe. I gha faẹn.’ Ẹre iran na datu wẹẹ: ‘Gbe ẹre rua! Gbe ẹre rua! Vbe iyeke ọni, ivbiyokuo keghi ya asan gbe Jesu, iran gie asẹn ku ọre, iran na vbe ya emwi kinmwi ẹnrẹn uhunmwu. Iran keghi ya erhan igban do ẹde mu ye ọre uhunmwu. Ẹre iran na gha yae gbogiẹ wẹẹ: ‘U gha tọ, u kpẹre, Ọba ọghe Ivbi e Ju.’ E Pailet keghi werriegbe tama emwa ni gbẹbu wẹẹ: ‘Okpia na ma rẹn ọkpa, rẹn eva.’ Sokpan iran na datu wẹẹ: ‘Wa kan rẹn mu erhan!’ Ẹre Pailet na ghi zẹ Jesu obọ, ne iran ya gbe ẹre rua.

Ivbiyokuo nii keghi mu Jesu gha rrie ehe na tie ẹre Gọlgọta. Iran ghi sẹ evba, iran keghi kan Jesu mu erhan. Iran ghi kan rẹn nẹ, iran na ghi tọn nene erhan mu. Jesu keghi na erhunmwu wẹẹ: ‘Evbavba lahọ yabọ iran, iran ma rẹn emwi ne iran ru.’ Emwa na gha ya Jesu gbogiẹ wẹẹ: ‘Adeghẹ Ovbi Osanobua ẹre u gele khin, tuorre vbe erhan nii, ne u miẹn egbe ruẹ fan.’

Iran keghi kan izigan eva sikẹ Jesu. Ọkpa vbọ na tama Jesu wẹẹ: ‘Yee mwẹ rre vbe u gha sẹ Arriọba ọghuẹ.’ Jesu keghi tama rẹn wẹẹ: “U gha gu mwẹ gha rre Paradais.” Vbe ọ ghi rre ẹghẹ avan, ebiebi keghi so vbe ẹvbo nii hia vbe ọwara ughaẹdẹ eha. Eso vbe erhuanegbe Jesu ghaa rre eke ne a na kan Jesu. Iye Jesu ighẹ e Meri vbe gha rre evba. Jesu keghi tama e Jọn ne ọ gbaroghe Meri, ne ọ gha ghee ẹre vbe na ghee iyẹe.

FẸre Jesu na ghi kha wẹẹ: ‘Ọ sẹ ufomwẹ nẹ!’ Vbe iyeke ọni, Jesu keghi vbokho ẹyaẹn, ọ na kpan udu. Vbe ọwarọkpa nii, igbohiotọ nọkhua keghi sunu. Ukpọn na ya ghae Ehe Nọhuanrẹn kevbe Ehe Nọ  Huan Sẹ Ehia vbe ọgua Osa keghi va ye ihe eva. Ẹre ovbiyokuo ọkpa na ghi kha wẹẹ: ‘Ovbi Osanobua te gele nọ.’