Mbọn̄ oku ẹma ẹmen Jesus ẹka ufọk ubọn̄ Pilate. Enye ama obụp mmọ ete: ‘Mbufo ẹdọhọ ke owo emi edue nso?’ Mmọ ẹma ẹbọrọ ẹte: ‘Enye ọdọhọ ke imọ idi edidem!’ Pilate ama obụp Jesus ete: ‘Ndi afo edi Edidem mme Jew?’ Jesus ama ọbọrọ ete: ‘Obio ubọn̄ mi isan̄ake n̄kpọ ye eke ererimbot emi.’

Pilate ama ọdọhọ ẹmen Jesus ẹbịne Herod, andikara Galilee, man Herod ese m̀mê enyene se enye eduede. Herod ikekwe n̄kpọ ndomokiet, ntre enye ama ọdọhọ ẹfiak ẹda Jesus ẹsọk Pilate. Ke ẹma ẹkeda enye ẹsịm do, Pilate ama ọdọhọ otuowo emi ẹkedude do ete: ‘Ami ye Herod ikwe se enye eduede. Mmọn̄ nsana enye nyak.’ Mmọ ẹma ẹfiori ẹte: ‘Wot enye! Wot enye!’ Mbonekọn̄ ẹma ẹkama urụk ẹtịm Jesus, ẹfiari enye etap, ẹsiak enye ufia, ẹnam anyanya n̄kukịm ẹyari enye, ẹnyụn̄ ẹdọhọ ẹte: ‘Ekọm do-o, Edidem mme Jew.’ Pilate ama afiak ọdọhọ otuowo oro ete: ‘N̄kwe se enye eduede.’ Edi mmọ ẹma ẹfiori ẹte: “Kọn̄ enye ke eto!” Pilate ama ayak Jesus ọnọ ẹkewot.

Mbonekọn̄ ẹma ẹda Jesus ẹka itie emi ekerede Golgotha, ẹkekọn̄ enye ke eto, ẹnyụn̄ ẹdịbede eto oro ẹwụk ke isọn̄. Jesus ama ọbọn̄ akam ete: ‘Ete, fen nọ mmọ, koro mmọ ifiọkke se mmọ ẹnamde.’ Mme owo ẹma ẹsak Jesus, ẹnyụn̄ ẹdọhọ ẹte: ‘Ekpedi afo edi Eyen Abasi, sụhọde ke eto oro di ise! Nyan̄a idemfo.’

Ẹma ẹkọn̄ mme anamidiọk iba ẹkpere Jesus n̄ko. Owo mmọ kiet ama ọdọhọ Jesus ete: ‘Ti mi ama odụk obio ubọn̄ fo.’ Jesus ama ọdọhọ enye ete: “Afo oyodu ye ami ke Paradise.” Uwemeyo oro, ekịm ama ofụk ofụri itie ke hour ita. Ndusụk mbet Jesus, esịnede Mary eka esie, ẹma ẹda ẹkpere eto emi ẹkekọn̄de Jesus. Jesus ama ọdọhọ John ada Mary nte eka esie onyụn̄ ese aban̄a enye.

Ke akpatre, Jesus ama ọdọhọ ete: “Okụre!” Enye ama osụk ibuot ke isọn̄ onyụn̄ ọduọk akpatre ibifịk. Kpa idahaoro, isọn̄ ama enyek idiọk idiọk. Akamba ọfọn̄ ikpehe emi akabaharede Edisana  ye Ata Edisana ebiet ke temple ama asiaha iba. Akwa owoekọn̄ ama ọdọhọ ete: “Ke akpanikọ owo emi ekedi Eyen Abasi.”