Era kauti Jisu na iliuliu ni bete ina vale ni kovana. E tarogi ira o Pailato: ‘Na cava nona cala?’ Era kaya: ‘E tukuna ni tui!’ E mani tarogi Jisu o Pailato: “O nodra Tui na Jiu?” E kaya o Jisu: “E sega ni vakavuravura na noqu Matanitu.”

E vakarota o Pailato me kau o Jisu vei Eroti, na iliuliu ni yasana o Kalili, me raica ke dua na ka me beitaki kina. E sega ni raica o Eroti e dua na cala, mani talai Jisu lesu vei Pailato. E qai tukuna vei ira na lewenivanua o Pailato: ‘Keirau sega ni raica kei Eroti e dua na ka me beitaki kina na tagane qo. Au na sereki koya.’ Era kailavaka na ilala levu: ‘Vakamatei koya! Vakamatei koya!’ Era kuitalaki Jisu na sotia, era kasivita ra qai sabaki koya. Era vakaisalataki koya ena wavakavotona ra qai veivakalialiai nira kaya vua: ‘Ni bula vinaka, nodra Tui na Jiu.’ E tukuna tale vei ira na ilala levu o Pailato: ‘Au sega ni raica vua e dua na cala.’ Ia era kailavaka: “Vakota ena kau!” E mani soli koya o Pailato me vakamatei.

Era kauti Jisu ena vanua e vakatokai o Kolikoca, era vakoti koya ena kau ra qai vakaduria. E masulaka o Jisu: ‘Tamaqu, vosoti ira, era sega ni kila na ka era cakava tiko.’ Era vakalialiai koya eso nira kaya: ‘Ke o Luve ni Kalou, siro mai na kaunirarawa! Vakabulai iko mada.’

E tukuna vei Jisu e dua vei rau na daubasulawa eratou lili vata tu: ‘Ni qai nanumi au ni oni sa tiko ena nomuni Matanitu.’ E yalataka vua o Jisu: “Daru na tiko vata mai Parataisi.” Ena sigalevu, e butobuto na vanua me tolu na aua. Eratou duri voleka tu eso na tisaipeli, kei Meri na tinai Jisu. E tukuna vei Joni o Jisu me qaravi Meri me vaka ga e tinana.

E qai kaya o Jisu: “Sa vakacavari!” E vakacuva na uluna, mai cavuka yani na nona icegu. Ena gauna vata qori, e yaco e dua na uneune kaukaua. E kasei rua na ilati ni valenisoro e dau  wasea na Loqi Tabu mai na Loqi Tabu Sara. E kaya e dua na turaganivalu: “Qo dina na Luve ni Kalou.”