D Oberprieschter bringed Jesus zum Palascht vom Pilatus, er isch de Statthalter. De Pilatus fragt si: «Was het dee Maa Falsches gmacht?» Si säged: «Er behauptet, dass er en König isch.» De Pilatus fragt denn Jesus: «Bisch du de König vo de Jude?» Jesus git ihm zur Antwort: «Mis Königriich isch kei Teil vo dere Welt.»

De Pilatus schickt denn Jesus zum Herodes, er isch de Herrscher vo Galiläa. De Pilatus wett wüsse, öb de Herodes öppis Schlechts a Jesus findet. Aber de Herodes findet nüt und schickt ihn wider zrugg zum Pilatus. De Pilatus seit denn zum Volk: «De Herodes und ich finded nüt Schlechts a Jesus. Ich wird ihn freilaa.» Aber d Lüt schreied: «Tue ihn töte! Tue ihn töte!» Nachher wird Jesus vo de Soldate uspeitscht, agspoizt und gschlage. Si leged ihm e Chrone us Dorne a und spöttled: «Grüezi, du König vo de Jude.» De Pilatus seit no einisch zum Volk: «Ich finde nüt Schlechts a ihm.» Aber si schreied: «A Pfahl mit ihm!» Schlussendlich lost de Pilatus ufs Volk und git de Befehl, Jesus z töte.

D Soldate bringed Jesus an en Ort, wo Golgotha heisst. Dört nagled si ihn an en Pfahl und stelled denn de Pfahl uf. Jesus betet: «Vater, vergib ihne, wil si wüssed gar nid, was si mached.» D Lüt lached Jesus us und säged: «Wenn du de Sohn vo Gott bisch, chumm vo dem Pfahl obenabe. Tue dich doch selber rette!»

En Verbrecher, wo nebe ihm am Pfahl hanget, seit: «Bitte denk a mich, wenn du i dis Königriich chunnsch!» Jesus verspricht ihm: «Du wirsch mit mir im Paradiis sii.» A dem Namittag wirds plötzlich im ganze Land drü Stund lang stockdunkel. D Maria, s Mami vo Jesus, und es paar anderi Jünger stöhnd i de Nöchi vom Pfahl. Da seit Jesus zum Johannes, er söll zu de Maria luege, wie wenn si sis eigete Mami wär.

Schlussendlich seit Jesus: «Es isch alles erfüllt!» Er laat sin Chopf la hange und stirbt. I dem Moment gits es heftigs Erdbebe. Im Tempel zwüsche em Heilige und em Allerheiligschte riisst de dick Vorhang vo obe bis unde usenand. En Offizier seit: «Das isch würklich de Sohn vo Gott gsi.»