Amaanüshi Jesuu natuma na laülaashiikana napüleerua na sacerdootekana eemüin nipia chi sülaülakai mma. «¿Kasa naainjalaka wayuukai chii?», nümaka joo Pilato namüin naya wayuukana. Namaka nümüin: «Nia wanee aluwataai naashin». Nüsakiraka Pilato Jesuu: «¿Piaʼaya chi aluwataashikai saaʼu wayuu judío?». «Nnojotsü yaajeʼewalüin mmapaʼa tü taluwataayakat», nümaka Jesuu.

Aluwataanüshi Jesuu mapa nutuma Pilato eemüin Herodes, chi aluwataakai saaʼu Galilea süpüla kasalajanain naainjala nutuma. Niasaʼa Herodes niyaawata aaʼuchi maainjalain Jesuu, nuluwataaka nia nüchikuaʼa eemüin Pilato. «Tayakai nümaa Herodes wayaawata aaʼu maainjalain wayuukai chii. Tajütirüinjachi achiki nia», nümaka joo Pilato sümüin tü wayuukalüirua. «Puʼutira naaʼin, puʼutirapan», sümaka tü wayuukalüirua sümaa emetuluin sünüiki. Niʼyaajünaka Jesuu natuma na surulaatkana, ejetüna aaʼuchi nia sümaa nüsheʼetünüin. Shiʼitaanaka nünain wanee kotse keimsesü saaʼu nikii otta nemeeʼerainpalashi nia. Müshii naya nümüin Jesuu: «Jamayaa pia aluwataashikalee». Nusoutaka joo Pilato nüchikuaʼa sümüin tü wayuukalüirua: «Maainjalasai wayuukai chii». Sümaka tü wayuukalüirua sümaa emetuluin maʼin sünüiki: «Pükacherapan». Naapaka Pilato nikii Jesuu sümüin tü wayuukalüirua süpüla nuʼutunajachin aaʼin.

Nuʼuninnaka Jesuu eemüin wanee wutai kanüliasü Gólgota. Nükachennaka Jesuu sünain wanee wunuʼu lotusü. Nuchuntaka Jesuu nümüin Jeʼwaa sünain maa: «Taata, moto paaʼin tü kasa mojusü naaʼinrakat naya wayuukana». Nemeeʼerainpalashi maʼin Jesuu na wayuukana sünain müin nanüiki: «¡Shiimainreje Nüchoin pia chi Maleiwakai püshakata yalejeechiki kataiwa poʼu!».

Müsü nünüiki wanee kaʼruwarai yalajachikai kachetüin nüʼütpaʼa Jesuu: «Anashi sotule taya paaʼin püikkalaapa sünain aluwatawaa». «Tamüshi pia soʼu kaʼikat tüü, cheechi pia tamaa suluʼu tü Paʼaraiisükat», nümaka Jesuu nümüin. Shiasaʼa aliika, shipiyuushijaaka mmapaʼaka soʼu apünüin oora. Eejana waneinnua nikirajüin Jesuu yalajanakana shaʼwatüin peje sünain eere nükachennüin, eejatü namaa María tü niikat Jesuu. «Paaʼinmaja María, müinjatü aka saaʼin wanee pii pümüin», nümaka Jesuu nümüin Juan.

«Kettaaitpa tatuma», müshi joo Jesuu süpülapünaa outuin nia. Outaka nia süchikijee tia. Wanaa maʼin sümaa tia, akutkujaasü mmaka jee asüküijaasü tü kuluulu pasanainkat suluʼu tü Aʼwaajüleekat Maleiwa. «Shiimainyala maʼin  sünain niain chi Nüchonkai Maleiwa», nümaka joo chi sülaülakai surulaat shaʼwatakai nümülatuʼu Jesuu.