Ovapristeri oviuru va twara Jesus kondjuwo yomuhonapare. Pilatus we ve pura na tja: ‘Omurumendu ngwi wa tjita ouvi watjike?’ Owo va tja: ‘Eye u ritja ombara!’ Pilatus wa pura Jesus na tja: “OOve ngu u ri ombara yOvajuda poo indee?” Jesus wa zira na tja: “Ouhona wandje kawouye mbwi.”

Okuzambo Pilatus wa hinda Jesus ku Herodus, ngwa ri omunane waGalilea, okutara kutja ma munu ondjo mu ye poo indee. Herodus kena pa muna ondjo mu Jesus nu e mu hindi rukwao ku Pilatus. Okuzambo Pilatus wa raera kotjiwaṋa na tja: ‘Ami na Herodus katu nakumuna ondjo momurumendu ngwi. Ami me mu kutura.’ Otjiwaṋa tja ravaera natji tja: ‘Mu zepa! Mu zepa!’ Ovarwe vovita ve mu tona nave mu tjekere omate. Owo va twa orutavi rwomakwiya kotjiuru tje nave utu okumunyekerera amave tja: “Minikwa, Mbara yOvajuda!” Pilatus wa raera kotjiwaṋa rukwao na tja: ‘Ami hi nakumuna ondjo momurumendu ngwi.’ Posiya owo va ravaera nave tja: ‘Kemupapere komuti!’ Okutja Pilatus arire tje mu yandja kutja ma ṱe.

Owo va twara Jesus koruveze ndu isanewa Golgota, ave mu papere nozomboha komuti okuzambo ave yerurura omuti. Jesus wa kumba na tja: ‘Tate, ve isira, orondu kave nakutjiwa kutja mave ungura tjike.’ Ovandu va tjita Jesus ouhahu amave tja: ‘Tjinangara oove Omuna waMukuru, heruka komuti! Riyama omuini.’

Umwe wovarunde mba ri meṋe ye komuti wa tja: “Ndji zemburuka tji wa hiti mouhona woye!” Jesus we mu kwizikira na tja: “Mo kakara puna Ami moparadisa.” Mozoiri zometaha nao, kwa kara onḓorera oure wozoiri 3 mehi arihe. Ovahongewa tjiva, na Maria ina yaJesus wina, va ri ava kurama meṋe yomuti ku kwa papererwe Jesus. Jesus wa raera Johanes kutja nga tjevere Maria tjimuna ina omuini.

Korusenina Jesus wa tja: “Tja tjitwa tja yenene!” Eye we ripeta otjiuru tje na pitisa omuinyo we omusenina. Oruveze ndwo, kwa tjitwa omanyinganyingiro wehi omanamasa. Erapi ezeu nda ri pokati kOtjouyapuke nOtjouyapukeyapuke mOndjuwo ondjapuke  yaMuhona ra tauka pokati. Omuhongore wovita wa tja: ‘Ingwi tjiri wa ri Omuna waMukuru.’