Ilori izerẹ na a tẹ rehọ Jesu kpobọ uwou Pailet ọba na. Pailet ọ tẹ nọ ae inọ: ‘Eme wha ta nọ ọzae nana o ru?’ A tẹ ta nọ: ‘Ọ be ta nọ ọyomariẹ yọ ovie!’ Pailet ọ tẹ nọ Jesu nọ: “Kọ whẹ họ Ovie ahwo Ju na?” Jesu ọ tẹ kpahe kẹe nọ: “Uvie mẹ u wo obọ kugbe akpọ nana ha.”

Pailet ọ tẹ rehọ Jesu bru Herọd, ọnọ o je su Galili, re ọ ruẹ sọ Jesu o ru oware jọ thọ. Rekọ Herọd ọ jọ oma Jesu ruẹ oware ovo nọ o ru thọ họ, fikiere ọ tẹ wariẹ zihe Jesu bru Pailet. Pailet ọ tẹ ta kẹ ahwo na nọ: ‘Mẹ avọ Herọd ma ruẹ oware ovo nọ ọzae nana o ru thọ họ. Me ti siobọnoi.’ Ogbotu na o te bo nọ: ‘Kpei no! Kpei no!’ Kẹsena isoja a tẹ jẹ fa Jesu, nwo eya ku ei, jẹ tehe iẹe. A tẹ rọ etu idhigbo tu ei je bi sei ẹkoko inọ: ‘Do, Ovie Ju.’ Pailet ọ tẹ wariẹ ta kẹ ogbotu na nọ: ‘Ọzae nana o ru oware ovo thọ họ.’ Rekọ a te bi bo nọ: “Kare iẹe fihọ ure!” Fikiere Pailet ọ tẹ rehọ Jesu kẹ ae re a nyai kpei.

A tẹ rehọ Jesu kpohọ oria nọ a re se Golgota, a tẹ kare iẹe fihọ ure-oja, a jẹ kpare ure na dikihẹ. Jesu ọ tẹ lẹ nọ: ‘Ọsẹ, rọvrẹ ai, keme a riẹ oware nọ a re ruo ho.’ Ahwo a je se Jesu ẹkoko inọ: ‘Otẹrọnọ whẹ yọ Ọmọ Ọghẹnẹ, no ehru ure-oja na ze! Siwi omara.’

Oji jọ nọ a kare kẹle Jesu ọ tẹ ta kẹe nọ: “Kareghẹhọ omẹ nọ whọ tẹ ruọ Uvie ra no.” Jesu ọ tẹ ya eyaa kẹe inọ: “Who ti lele omẹ jọ Aparadase.” Evaọ oke uvo, oria kpobi u te muebi euwa esa soso. Ilele na jọ a te dikihẹ akotọ ure-oja na, Meri oni Jesu ọ jọ etẹe re. Jesu ọ tẹ vuẹ Jọn inọ ọ rẹrote oni riẹ.

Uwhremu na, Jesu ọ tẹ ta nọ: “U rugba no!” O te gbe uzou họ otọ, o te whu. Ẹsiẹvo na, otọ u te nuhu gaga. Evaọ obọ etẹmpol na, ekọtini aruẹri na o tẹ bẹre ewẹ ivẹ no ehru duwu  otọ. Oletu isoja na ọ tẹ ta nọ: ‘Ọzae nana ginọ Ọmọ Ọghẹnẹ.’