Hkinjawng agyi ni gaw Yesu hpe munggyi htingnu de shaga sa wa ai. Pilat gaw shanhte hpe ndai hku san ai: ‘Ndai wa hpe hpa majaw mara shagun ai kun?’ Shanhte ndai hku tsun ai: ‘Shi hkum shi hkawhkam ngu nna tsun ai majaw re.’ Dai majaw, Pilat gaw Yesu hpe ndai hku san ai: ‘Nang gaw Yuda ni a Hkawhkam kun?’ Yesu ndai hku tsun ai: ‘Nye a mungdan gaw ndai mungkan ga hte n seng ai.’

Dai majaw, Pilat gaw Yesu hta mara nga n nga chye na matu, Galile munggyi Herod hpang de sa dat ai. Herod mung Yesu hta mara tam n mu ai majaw, Pilat hpang de bai sa dat ai. Dai hpang, Pilat gaw masha ni hpe ndai hku tsun ai: ‘Herod mung, ngai mung ndai wa hta mara tam n mu ai. Ngai shi hpe dat dat sana.’ Dai shaloi, masha hpawng gaw ndai hku marawn wa ai: ‘Shi hpe sat kau u! Sat kau u!’ Hpyen la ni gaw Yesu hpe lasik hte kayat ai, mayen mahtaw bun ai sha n-ga htwi mung htwi ai. Shanhte gaw Yesu hpe ju hpun hte galaw da ai janmau hpe gup ya nna ndai hku jahpoi asawng ai: ‘Yuda ni a Hkawhkam wa e, a lu ai shani rai u ga.’ Pilat gaw masha hpawng hpe ndai hku bai tsun ai: ‘Ndai wa hta hpa mara mung n mu ai.’ Raitim, shanhte ndai hku marawn tsun ai: ‘Shi hpe hpun hta jen da u!’ Dai majaw, Pilat gaw Yesu hpe sat na matu ap kau ai.

Hpyen la ni gaw Yesu hpe Golgohta ngu ai shara de shaga sa mat ai. Yesu hpe hpun hta hpri hte kayat nna dai shadaw hpe sharawt dat ai. Yesu ndai hku akyu hpyi ai: ‘Wa e, shanhte a mara hpe raw dat kau ya rit. Shanhte gaw shanhte hpa galaw nga ai hpe n chye ma ai.’ Masha ni gaw Yesu hpe mani hpa shatai nna ndai hku tsun ai: ‘Nang gaw Karai Kasang a Kasha rai yang, dai shadaw kaw nna yu wa rit. Na hkum nang hkye la u.’

Yesu makau hta nga ai damya langai mi gaw ndai hku tsun ai: ‘Na a mungdan du wa yang, ngai hpe dum ya rit.’ Yesu ndai hku ga sadi jaw ai: ‘Nang ngai hte arau Hparadisu hta nga lu na re.’ Shani chyingtung aten kaw nna, hkying hkum masum daram na hkra, mung ting nsin chyip rai mat ai. Yesu a kanu Mari hte sape nkau mi mung, hpun shadaw makau hta tsap nga ma ai. Mari hpe kanu majing hku nna yu lanu lahku ya na matu, Yawhan hpe Yesu htet ai.

Hpang jahtum Yesu gaw, ‘amu ngut sai’ ngu tsun nna, shi a baw gum dagup let, si mat ai. Dai aten hta sha, nnang nawn kaba nawn mat ai. Nawku htingnu na Chyoi Pra ai gawk hte Chyoi Pra Htum ai gawk lapran na nba grang gaw,  ka-ang brang ga mat ai. Dai shaloi, hpyen du langai ndai hku tsun ai: ‘Shi gaw gaja wa Karai Kasang a Kasha rai nga ai.’