Ovapristeri ovakulunhu ova li va twala Jesus kombala yomupangeli. Pilatus okwe va pula a ti: ‘Omulumenhu ou okwa nyona shike?’ Ova ti: ‘Ote liti kutya ohamba.’ Pilatus okwa pula Jesus a ti: ‘Ove Ohamba yOvajuda?’ Jesus okwe mu nyamukula a ti: “Ouhamba wange kau fi womounyuni ou.”

Opo nee Pilatus okwa li a tuma Jesus kuHerodes, omupangeli waGalilea, opo a ka tale ngeenge ote mu mono etimba lasha. Herodes ka li a mona Jesus etimba lasha nokwa li e mu shunifa kuPilatus. Opo nee Pilatus okwa lombwela ovanhu a ti: ‘Fye naHerodes inatu mona etimba lasha momulumenhu ou. Ame ohandi mu mangulula.’ Ovanhu ova li va ingida tava ti: ‘Na dipawe! Na dipawe!’ Ovakwaita ova denga Jesus nongola, tave mu fiile omate noku mu denga neengonyo. Ova li ve mu dika oshikoroni shomakiya komutwe noku mu sheka tava ti: ‘Kundwa, ohamba yOvajuda.’ Pilatus okwa li vali a lombwela ovanhu ta ti: ‘Ame inandi mona etimba lasha momulumenhu ou.’ Ndele ovanhu ova ingida tava ti: ‘Na valelwe!’ Opo nee Pilatus okwa yandja Jesus a ka dipawe.

Ova li va twala Jesus konhele hai ifanwa Golgata noku mu valela komuti, ndele tave u kaleke ofika. Jesus okwa ilikana a ti: ‘Tate, va dimina po, osheshi kave shii osho tava ningi.’ Ovanhu ova li ve mu sheka tava ti: ‘Ngeenge ove Omona waKalunga, dja ko komuti oko! Lixupifa.’

Omukolokoshi umwe oo a li a valelwa popepi naJesus okwa ti: “Jesus, dimbulukwe nge ngeenge wa fiki mouhamba woye.” Jesus okwe mu udanekela a ti: ‘Oto ka kala pamwe naame mOparadisa.’ Omutenya, opa li pa holoka omilaulu oule weevili nhatu moshilongo ashishe. Ovahongwa vamwe ova li va fikama popepi nomuti womahepeko, mwa kwatelwa Maria ina yaJesus. Jesus okwa li a lombwela Johannes a file oshisho Maria ngaashi ta file oshisho ina.

Opo nee, Jesus okwa ti: “Sha longwa sha pwa.” Okwa nyongameka omutwe waye ndele ta fuda mo omufudo waye waxuuninwa. Pomhito oyo, opa li pa ningwa ekakamo ledu linene. Elapi linene olo la li pokati kOuyapuki nOuyapukielela motembeli ola li la tauka pokati. Omukwaita umwe okwa ti: ‘Ou Omona waKalunga shili.’