တၢ်မၤလိ ၉၀
ယ့ၣ်ၡူးသံလၢ ကီၤလၤကီၤသါ
ပှၤလုၢ်တၢ်အဒိၣ်တဖၣ် လဲၤကိးယ့ၣ်ၡူးဆူ ပဒိၣ်ဖးဒိၣ်အနီပူၤလီၤ. စီၤပံၤလးသံကွၢ်အဝဲသ့ၣ်လၢ– ‘သုပာ်ဒ့ၣ်ပာ်ကမၣ် ပှၤတဂၤအံၤလၢတၢ်ဂ့ၢ်မနုၤလဲၣ်.’ ပှၤလုၢ်တၢ်အဒိၣ်တဖၣ် တဲဆၢက့ၤဝဲလၢ– ‘အဝဲတဲလီၤအသးလၢ အမ့ၢ်စီၤပၤတဂၤလီၤ.’ ဒီးစီၤပံၤလးသံကွၢ်ယ့ၣ်ၡူးလၢ– “နဲဒၣ်အံၤနမ့ၢ် ပှၤယူဒၤဖိ အစီၤပၤန့ၣ်ဧါ.” ယ့ၣ်ၡူးတဲဆၢက့ၤအီၤလၢ– “ယဘီယမုၢ် တဘၣ်ဃးဘၣ်ဒီး ဟီၣ်ခိၣ်အံၤဘၣ်.”
ဝံၤဒီးစီၤပံၤလး မၢပှၤလဲၤကိးယ့ၣ်ၡူးလၢ စီၤဟ့ၤရိာ်အအိၣ် ဒ်သိးကသမံသမိးဝဲလၢ မ့ၢ်ယ့ၣ်ၡူး အတၢ်ကမၣ်အိၣ်ဧါ တအိၣ်ဧါန့ၣ်လီၤ. စီၤဟ့ၤရိာ်မ့ၢ်ပှၤတဂၤလၢ အပၢကီၢ်ကၤလံၤလါန့ၣ်လီၤ. ဘၣ်ဆၣ် စီၤဟ့ၤရိာ်ဃုဝဲယ့ၣ်ၡူးအတၢ်ကမၣ်တဘၣ်ဘၣ်. အဃိ အဝဲဆှၢကဒါက့ၤယ့ၣ်ၡူးလၢ စီၤပံၤလးအအိၣ်လီၤ. ဝံၤဒီး စီၤပံၤလးတဲဘၣ် ပှၤဂီၢ်မုၢ်လၢ– ‘စီၤဟ့ၤရိာ်မ့ၢ်ဂ့ၤ ယၤမ့ၢ်ဂ့ၤ ပတထံၣ်လၢ ပိာ်ခွါတဂၤအံၤ အတၢ်ကမၣ်အိၣ်ဝဲဘၣ်. အဃိ ယကပျၢ်ကွံာ်အီၤလီၤ.’ ဘၣ်ဆၣ် ပှၤဂီၢ်မုၢ်ကိးပသူထီၣ်လၢ– ‘မၤသံအီၤ, မၤသံအီၤ.’ ဝံၤဒီးပှၤသုးဖိတဖၣ် ဖျ့ယ့ၣ်ၡူးဒီးပျံၤ, ထူးပှဲာ်ဒိးအီၤဒီးတီၢ်အီၤလီၤ. အဝဲသ့ၣ်ဒုးဖျီၣ်ထီၣ်ဝဲ ယ့ၣ်ၡူးလၢခိၣ်သလုးတၤဆှုၣ်လီၤ. ဒီးအဝဲသ့ၣ်တဲဆါယ့ၣ်ၡူးလၢ– ‘နံၤလၢအဂ့ၤ, ပှၤယူဒၤဖိအစီၤပၤဧၢ.’ ဝံၤဒီးစီၤပံၤလး တဲဘၣ်ကဒီးပှၤဂီၢ်မုၢ်လၢ– ‘ပိာ်ခွါတဂၤအံၤ အတၢ်ကမၣ်တအိၣ်ဘၣ်.’ ဘၣ်ဆၣ် ပှၤဂီၢ်မုၢ်ကိးပသူထီၣ်လၢ– ‘ပျၤထီအီၤလၢ သ့ၣ်တၢၣ်အလိၤသၢၣ်.’ အဃိ စီၤပံၤလး ဟ့ၣ်လီၤယ့ၣ်ၡူး ဒ်သိးပှၤကမၤသံအီၤအဂီၢ်လီၤ.
အဝဲသ့ၣ်လဲၤကိးယ့ၣ်ၡူးလၢ တၢ်လီၢ်တခါကိးဝဲလၢ ကီၤလၤကီၤသါ ဒီးပျၤထီအီၤလၢ သ့ၣ်တၢၣ်အလိၤဖဲန့ၣ်လီၤ. ဒီးယ့ၣ်ၡူးဃ့ဘါထုကဖၣ်လၢ– ‘ပၢ်ဧၢ, မ့ၢ်လၢအဝဲသ့ၣ်တသ့ၣ်ညါဝဲအဃိ မၤဘၣ်ဝဲလီၤ. ဝံသးစူၤ ပျၢ်အဝဲသ့ၣ်အတၢ်ဒဲးဘးတက့ၢ်.’ ပှၤဂီၢ်မုၢ်တဲဆါယ့ၣ်ၡူးလၢ– ‘နမ့မ့ၢ်ယွၤအဖိခွါန့ၣ် မၤပူၤဖျဲးနနီၢ်ကစၢ်အသး ဒီးစံၣ်လီၤလၢသ့ၣ်တၢၣ်အလိၤသၢၣ်.’
ပှၤအၢပှၤသီတဂၤလၢ အိၣ်လၢယ့ၣ်ၡူးအကပၤန့ၣ် တဲဘၣ်ယ့ၣ်ၡူးလၢ– “တုၤနဟဲလၢနဘီနမုၢ်အပူၤဒီး, သ့ၣ်နီၣ်ထီၣ်က့ၤယၤတက့ၢ်.” ဒီးယ့ၣ်ၡူးအၢၣ်လီၤအီၤလၢ– “နကအိၣ်ဒီးယၤလၢ ပၤရဒံစူးအပူၤလီၤ.” ဖဲမုၢ်ဃ့ၢ်လီၤအဆၢကတီၢ် တၢ်ခံးလီၤဝဲလၢကီၢ်ဒီဘ့ၣ်ညါ, ယံာ်ဝဲသၢနၣ်ရံၣ်လီၤ. ယ့ၣ်ၡူးအပျဲၢ်အဘီၣ်တနီၤဒီး အမိၢ်နီၢ်မၤရံန့ၣ် ဆၢထၢၣ်ဝဲဘူးဒီးသ့ၣ်တၢၣ်လီၤ. ဒီးယ့ၣ်ၡူးမၢဝဲစီၤယိၤဟၣ်လၢ ကကွၢ်ထွဲက့ၤနီၢ်မၤရံ ဒ်အမိၢ်တဂၤအသိးန့ၣ်လီၤ.
လၢခံကတၢၢ်န့ၣ် ယ့ၣ်ၡူးတဲဝဲလၢ “တၢ်လၢထီၣ်ပှဲၤထီၣ်လံ.” ဝံၤဒီး ယ့ၣ်ၡူးအခိၣ်လီၤဖျး ဒီးသံဝဲလီၤ. ဖဲန့ၣ်အဆၢကတီၢ် ဟီၣ်ခိၣ်ဟူးဝဲဖးဒိၣ်လီၤ. ဒီးလၢ တၢ်လုၢ်ဟံၣ်အပူၤန့ၣ် ယၣ်ဘျးသဒၢဖးဒိၣ်တဘ့ၣ်လၢ အအိၣ်ဝဲလၢတၢ်လီၢ်စီဆှံ ဒီးတၢ်လီၢ်စီဆှံကတၢၢ်အဘၢၣ်စၢၤန့ၣ် ညာ်ကွံာ်ဝဲခံက့လီၤ. ပှၤသုးဖိတဂၤတဲဝဲလၢ– ‘အဝဲမ့ၢ်ဝဲ ယွၤအဖိခွါနီၢ်ကီၢ်လီၤ.’
“ဖဲဒၣ်ယွၤစံးပာ်တၢ်တဖၣ်, မ့ၢ်တၢ်မ့ၢ်လၢအဝဲဒၣ်အပူၤ” လီၤ.—၂ ကရံၣ်သူး ၁:၂၀
တၢ်ဂ့ၤအဂၤလၢ နကဘၣ်သး
လံာ်စီဆှံ အတၢ်သိၣ်လိလၢ အရ့ဒိၣ်တဖၣ်
ဘၣ်မနုၤအဃိ ယ့ၣ်ၡူးတူၢ်သံအသးလဲၣ်
လံာ်စီဆှံ ပာ်ဖျါထီၣ်ဝဲလၢ ယ့ၣ်ၡူးအတၢ်သံန့ၣ် မ့ၢ်တၢ်လၢအရ့ဒိၣ်ဒိၣ်မးလီၤ. ဒီးအတၢ်သံန့ၣ် ကဲဘျုးဒ်လဲၣ်.
