E nganga zambuta banata Yesu kuna lumbu lwa nguvulu. Pilato wabayuvula vo: ‘Nkia diambu diambi kavangidi o muntu ndioyo?’ Bavutula vo: ‘Edi kevovanga vo yandi i ntinu.’ Pilato wayuvula Yesu vo: ‘Ngeye i Ntinu a Yuda?’ Yesu wavutula vo: “Kintinu kiame ke kia nza yayi ko.”

I bosi, Pilato watwika Yesu kwa Erodi wa mfumu a Ngalili mu zaya kana vo olenda solola diambu muna yandi. Wau vo Erodi kasolola diambu diambi ko muna Yesu, wamvutula diaka kwa Pilato. Muna kuma kiaki, Pilato wavovesa nkangu vo: ‘Mono yo Erodi ke tumuene diambu diambi ko muna muntu ndioyo. Nzolele kumvevola.’ Kansi o nkangu wakaza vo: ‘Umvonda! Umvonda!’ Masoladi bayantika wanda Yesu muna lubamba, kuntawulwila mete yo kunwanda e nkome. Bansia e mpu a nsende vana ntu, bayantika kunseva yo vova vo: “Kiambote kiaku, e Ntinu a Ayuda!” I bosi, Pilato wavovesa diaka nkangu vo: ‘Kimuene diambu diambi ko muna muntu ndioyo.’ Kansi o nkangu wakaza vo: “Yambula kamanikwa vana nti!” Muna kuma kiaki, Pilato wayekola Yesu vana moko mau kimana bamvonda.

Banata Yesu vana fulu kiayikilwanga vo Ngolongota, bankoma vana nti yo telamesa wo. Yesu wasamba vo: ‘E Tata, ubaloloka, kadi ke bazeye ko dina bevanganga.’ O nkangu wayantika seva Yesu yo vova vo: ‘Avo ngeye i Mwan’a Nzambi, kulumuka vana nti bakomene. Uyivuluza.’

Mosi muna yimpumbulu ana bakomwa vana ndambu andi wavova vo: “Unsungamena vava okota muna Kintinu kiaku.” Yesu wansia nsilu vo: “Okala yame muna Paradiso.” Muna masika, e nsi yawonso yabukama ye tombe mu tezo kia ola tatu. Akaka muna alongoki batelama vana ndambu a nti. Mosi muna yau i Maria wa ngudi a Yesu. Yesu wavovesa Yoane vo katoma lunga-lunga Maria nze ngudi andi.

I bosi, Yesu wavova vo: “Dilunganene!” Vava kavova e mvovo miami, ovetekele ntu, ofwidi. Vana vau, o ntoto wazakama mu  ngolo. Muna tempelo, o nlele wavambulanga e Suku Diavauka ye Mumpungu-vauka watiazuka vana kati. O mfumu a makesa wavova vo: ‘Kieleka, ndioyo i Mwan’a Nzambi kikilu.’