Baprisita babahulu baisa Jesu kwa ndu ya mubusisi. Pilato ababuza kuli: ‘Ki taba mañi yemutama mutu yo?’ Baalaba bali: ‘Uipapata kuba mulena!’ Pilato abuza Jesu kuli: “Kana ki wena Mulena wa Majuda?” Jesu aalaba kuli: “Mubuso waka haki wa lifasi le.”

Cwale Pilato aisa Jesu ku Heroda, mubusisi wa Galilea, kuli ayo bona haiba ukafumana mulatu ku yena. Heroda naasika fumana mulatu ku Jesu mi hamukutisa hape ku Pilato. Cwale Pilato abulelela batu kuli: ‘Na ni Heroda halusika fumana mulatu ku muuna yo. Nika mulukulula.’ Batu kihaa bahuwa kuli: ‘Mubulaye! Mubulaye!’ Masole bashapa Jesu ka pafa, bamukwela mati, ni kumunataka. Bamubeya kuwani ya bulena ya miutwa kwa toho mi bamusheununa, kuli: ‘Lumela, Mulena wa Majuda.’ Pilato hape abulelela sicaba kuli: ‘Hakuna mulatu onifumani ku muuna yo.’ Kono bahuwa kuli: “Apahekiwe fa kota!” Kacwalo, Pilato abafa yena kuli abulaiwe.

Baisa Jesu kwa sibaka sesibizwa Gologota, bamukokotela fa musumo, mi bauyemisa. Jesu alapela, ali: ‘Ndate, baswalele, kakuli habazibi zebaeza.’ Batu basheununa Jesu, inze babulela kuli: ‘Haiba u Mwanaa Mulimu, tuluka fa kota! Hakuipilise.’

Yomuñwi wa likebenga zenekokotezwi kwatuko ni yena abulela kuli: “Unihupule hauka kena mwa Mubuso wahao.” Jesu amusepisa kuli: “Ukaba ni na mwa Paradaisi.” Ka nako ya musihali, kwaba ni lififi lene litandile lihora zetaalu mwa sibaka seo. Babañwi ba balutiwa bahae bayema kwatuko ni kota, kukopanyeleza cwalo Maria, mahe Jesu. Jesu abulelela Joani kuli ababalele Maria sina mwanaaka babalela bo mahe kasibili.

Kwa mafelelezo, Jesu abulela kuli: “Kupetahalile!” Ainamisa toho yahae mi ahoha moya lwa mafelelezo. Honafo feela, kwaba ni zikinyeho yetuna. Mwa tempele, lisila leli bukiti lene likauhanya Sibaka Sesikenile  ni Sibaka Sesikenile Hahulu lapazuha fahali. Muzamaisi wa masole abulela kuli: ‘Kaniti yo luli neli Mwanaa Mulimu.’