Nopa sacerdotes kiuikakej Jesús kampa itstoya nopa tlanauatijketl Pilato, uan ya kintlajtlanik: “¿Kenke inkiteiljuiaj ni tlakatl?”. Inijuantij kinankilijkej: “¡Ni tlakatl kiijtoua eli se tlanauatijketl!”. Pilato kitlajtlanik Jesús: “¿Ta tiinintlanauatijka judíos?”. Jesús kinankilik: “NoTlanauatilis amo eltok ipan Tlaltipaktli”.

Teipa Pilato tlanauatik ma kiuikakaj Jesús kampa itstoya Herodes, katli tlanauatiyaya ipan Galilea. Kinekiyaya kimatis tlaj Herodes kipantiskia tlake ika kiteiljuis. Herodes kiitak Jesús amo tlaixpanotoya. Yeka tlanauatik sampa ma kiuikakaj kampa itstoya Pilato. Uajka Pilato kiniljuik nopa maseualmej: “Herodes uan na tikitaj ni tlakatl amo tlaixpanotok. Yeka nijkauas ma yaui”. Uajka nopa maseualmej chikauak kiijtojkej: “¡Xijmikti! ¡Xijmikti!”. Teipa nopa soldados kimakilijkej, kichajchakej uan kiuijuitejkej. Nojkia kitlalilijkej se uitscorona uan kipinajtijkej, uan kiiljuijkej: “Tiinintlanauatijka judíos, ¿kenijkatsa tiitstok?”. Pilato sampa kiniljuik: “Na nikita ni tlakatl amo tlaixpanotok”. Uan maseualmej chikauak kiijtouayayaj: “¡Xijkuapilo ipan se kuauitl!”. Yeka Pilato kikajki ma kiuikakaj Jesús uan ma kimiktikaj.

Teipa, kiuikakej Jesús kampa kiiljuiaj Gólgota. Kimalavosuijkej uan kikuapilojkej. Jesús momaijtok uan kiiljuik Jehová: “NoTata, xikintlapojpoljui pampa axkimatij tlen kichiuaj”. Maseualmej kipinajtiyayaj Jesús uan kiiljuiyayaj: “¡Tlaj nelia tiiKone toTeotsij, xitemo uan ximomanaui!”.

Omej tlachtekinij kinkuapilojtoyaj inakastla Jesús, se kiiljuik: “Xinechilnamiki kema titlanauatis”. Jesús kiiljuik: “Tiitstos nouaya ipan Xochimili”. Ika tiotlak, tlatlayouak eyi hora. Se keskij Jesús itokilijkauaj mokajkej kampa kikuapilojtoyaj, nojkia mokajki María, inana Jesús. Jesús kiiljuik Juan ma kimokuitlaui María kejuak eliskia inana.

Teipa, Jesús kiijtok: “¡Ya nitlamichijki tlen noTata nechiljuik ma nijchiua!”. Mixtojki uan mijki. Uajka chikauak mojmolinik tlali. Uan tsayanki nopa ueyi cortina tlen eltoya ipan teokali, tlen eltoya  tlatlajko Kampa tlatsejtseloltik uan Kampa tlauel tlatsejtseloltik. Uajka, se soldado kiijtok: “Ni tlakatl nelnelia eliyaya toTeotsij iKone”.