Vatungamiriri vo vapiri vakatora Jesu voenda naiyena kuna Pirato. Pirato wakavabvunjisa kuti: ‘Zvicinyi zvaaita mundhu uu?’ Ivona vakati: ‘Anozviita Mambo!’ Pirato wakabvunjisa Jesu kuti: “Ndiwe Mambo wo vaJudha kani?” Jesu wakapingura kuti: “Umambo wangu asipi wo pasi pano.”

Perepo, Pirato wakatumira Jesu kuna Herodhi, mutongi wo Garireya kuti avone dangani ano ndava kana kuti haiwa. Herodhi aazivi kuwana ciri cese cakashata kuna Jesu, ngo kudaro wakamuhwirija kuna Pirato. Paakahwirira Pirato wakabvunja bungano kuti: ‘Inini na Herodhi apana ndava iri yese yatawana pa mundhu uwu. Ndinomusia aende.’ Vandhu vakatanga kumima veciti: ‘Ngaurawe! Ngaurawe!’ Masoca akatanga kumurova, kumupfirira mata no kumutuka. Vakamusimija junguja ro muzwa zve vakatanga kumuseka veciti: ‘Tamuvona, Mambo o vaJudha.’ Pirato wakabvunjazve bungano kuti: ‘Apana cakashata pa mwanarume uu.’ Asi ivona vakamima veciti: ‘Pa danda naye!’ Asi Pirato wakazotendera kuti Jesu aurawe.

Masoca akatora Jesu vomuendesa ku ndau yaidanwa Gorgota, vomukhohomera pa danda perapo voriimisa. Jesu wakaita mukumbiro eciti: ‘Baba, varegererenyi ngokuti avazvizivi zvavari kuita.’ Vandhu vakatanga kumuseka, veciti: ‘Kudari iwewe uri Mwana wa Mwari, bzukai! Jiponesei.’

Mbabva imweni yainga yakakohomehwa pa divi rake yakati: “Jesu, ceukijanyi inini mukaguma ku Umambo hwenyu.” Jesu wakamugondesa kuti: ‘Zvokadi inini ndinokubvunja nyamasi kuti, iwewe unozova na inini mu Paradhiso.’ No masikati, zuva rakajima zve cidima cakazaja nyika yese pa nguva ndhatu. Vajiji vamweni vake, vainga vakaima pa danda, kubatanija na Maria mai wa Jesu. Jesu wakabvunja Johani kuti angwarire Maria inga kuti ndi mai wake.

Mu kupejisira Jesu wakati: “Bzese bzapera.” Wakakotamisa musoro wake zve wofema pa kupejisira. Pa nguva yondhoyo, kwakaitika kuzungunyika ko nyika kwakavanga maningi. Mu temberi, jira ro nyumba ya Mwari  yo ndau Yakacena rakaparuka ngo pakati kubvira nyezuru mbhera pasi. Umwe musoca wakati: ‘Zvokadi uu wainga Mwana wa Mwari.’