Alipa a ephepa yaamukuxa Yesu emukeriha empa ya musatoro Pilato. Owo aahaakoha: ‘Echu taani munamusomelaanyu mulopwana ola?’ Awo yaamwaakhula: ‘Owo ohiiseera okhala mwene!’ Pilato aamukoha Yesu: ‘Weyaano wa Mwene a Ayuta?’ Yesu aahi: ‘Omwene aka tahi wa elapo yeela.’

Voocharela Pilato aamukeriha Yesu wa Herote yoowo aari mulamuleli o Kalileya wi amwaavyerye nthowa. Herote haawenrye omphwanyerya nthowa, nave aamukookiherya wa Pilato. Nave Pilato aahi wa achu: ‘Naari Herote haphwannye nthowa na mulopwana ola. Miyo kinammutaphula.’ Nto muloko waakhuwela: ‘Akhwe! Akhwe!’ Anakhoco yaanwaxula, emutaphera mara ni omvaha makofi. Yaanwariha ekhara ya miiwa mmuruni mwawe nave yaanamuroha eriki: ‘Mooni mwene a Ayuta.’ Pilato aaloca tho ekwaha yanaawiili ariki: ‘Nkinoona echu opahunleiye mulopwana ola.’ Nto achu yaakhuwela: ‘Mmuthomeye, mmuthomeye!’ Vanonto Pilato aamveleela wi iiphiwe.

Yaamukuxa Yesu emukeriha nipuro nawiichaniwa Kolokota, yaamukhomela vamwirini nave yaathipela mwiri owo. Yesu aavekela: ‘Tiithi mwaalevelele, hasuwenle aneeraaya.’ Achu yaathata ni Yesu eriki: ‘Waari Mwaana a Muluku wiivuluxe mukhataa.’

Mulopwana mmoha aweera soonanara yoowo aakhomeliwe vakhiviru vawe aaloca ni Yesu: ‘Mukuupuwele miyo mwarwa moomweneni mwanyu.’ Yesu aamuroromeliha ariki: ‘Onamukhala ni miyo moomweneni.’ Othana yaarwa epiiphi ya iwora raru yeeyo yaasaren’ye voothevene. Oohuserya awe akina yaari vakhiviru ophitaanyerya Mariya amannya a Yesu. Yesu aamuleela Yohani wi amukhapelele Mariya ntoko amannya.

Voomaliheryani Yesu aahi: ‘Soothene soheereya.’ Owo aahuuramiha muru awe nave aakumiha nwiya wookuchula. Mweelukuluku yeeyo aaheereya mwaacikinye mutokweene. Mu empa ya Muluku yaakhalamo ekuwo yeeyo yaapanke munlaano variyari va  Nipuro Naweela ni Nipuro Naweelaxa, nave ekuwo eyo yaakawanyeya veeri. Mutokweene a anakhoco aahi: ‘Ola chiryene aari Mwaana a Muluku.’