Ovanene-nakwa vatuala Jesus komutumini. Pilatu evepulu okuti: ‘Oityi omulume ou alinga?’ Ngwe avati: ‘Ukahi nokupopia okuti ndyihamba!’ Pilatu apulu Jesus okuti: “Ove Uhamba yo va Judeu?” Jesus akumbulula okuti: “Ouhamba wange kaulingi onthele youye uno.”

Konyima Pilatu atumu ovanthu vatuale Jesus ku Helode, omutumini wo ko Galileia, opo atale inkha Helode upondola okuvasa tyimwe tyapenga mu Jesus. Inkha Helode kavahile natyike tyapenga mu Jesus, ankho upondola okumukondola vali ku Pilatu. Konyima, Pilatu apopila ovanthu okuti: ‘Tyilinge Helode, tyilinge ame, katuavasile natyike omulume ou alinga tyapenga. Ame mandyimuyovola.’ Mahi ovanthu avapopila peulu okuti: ‘Aipawe! Aipawe!’ Omafualali aavete Jesus noluhonge ine ongola, otyo vemunthila omate. Avemupake otyikeka tyomakete momutwe iya otyo vapopia okuti: ‘Okamene, Hamba yo va Judeu.’ Konyima Pilatu apopila vali ovanthu okuti: ‘Ame havasile natyike omulume ou alinga tyapenga.’ Mahi ngwe avapopila peulu okuti: “Apapelwe momuti!” Konyima, Pilatu emuyeke opo akaipawe.

Avatyindi Jesus iya avemutuala pomphangu imwe itiwa Golgota, avemutyindisa omuti iya avemupapela-mo. Jesus elikuambela okuti: ‘Tate, veevela, mokonda etyi vekahi nokulinga kavetyii.’ Ovanthu otyo valinga omukuele Jesus, otyo vapopia okuti: ‘Inkha ove Umona wa Huku, tuluka momuti! Liyovola.’

Ongangala imwe yapapelelwe momuti ponthele ya Jesus aihimbika okupopia okuti: “Nthyinangele tyina wamanyingila Mouhamba wove.” Mahi Jesus emulae okuti: “Mokakala naame Momphangu Yombembwa.” Monthiki oyo kekumbi, akuya enthiki limwe enene alihiki ohi aiho, alikala onoola ononthatu. Vamwe povalongwa ankho vekahi ponthele yomuti apapelelwa, kumwe na Maliya me ya Jesus. Jesus apopila João opo atekule Maliya ngatyina o me yae.

Okuhulililako, Jesus apopi okuti: “Atyiho tyafuisuapo!” Ayendeleka ehinga iya akondola omuenyo ankhi. Pomuvo oo, apamoneka otyinimawe tyimwe otyinene. Otyinyanga ankho tyateta pokati Osandu  Nosandisimu mondyuo ya Huku atyitanduka pokati. Efualali limwe alipopi okuti: ‘Tyotyili ou ankho Omona wa Huku.’