Abanyamurwa abakuru bakatwara Yesu ow’omutegyeki waabo. Pilaato akababuuza ati: ‘Omushaija ogu akozire kibi ki?’ Bakamugarukamu bati: ‘Naayeyeta omugabe.’ Pilaato akabuuza Yesu ati: “Weeza ori Omugabe w’Abayudaaya?” Yesu akamugarukamu ati: “Obugabe bwangye ti bw’ensi egi.”

Bwanyima Pilaato akoohereza Yesu owa Heroode, omutegyeki wa Galilaaya ngu areebe yaaba aine eki akozire. Heroode akareeba Yesu ataine rubanja kandi akagaruka yaamwohereza owa Pilaato. Bwanyima Pilaato akagambira abantu ati: ‘Nyowe nari Heroode titurikureeba rubanja oru omushaija ogu aine. Naaza kumurekura.’ Abantu bakayomba munonga, bati: ‘Mwite! Mwite!’ Abaserukare bakateera Yesu n’orukoba, baamucwera amacwante aha maisho, kandi baamuteera empi. Bakamujweka ekirunga ky’amahwa aha mutwe batandika kumugira bati: ‘Osingire, Omugabe w’Abayudaaya.’ Pilaato akagaruka yaagambira abantu ati: ‘Omushaija ogu taine rubanja.’ Kwonka abantu bakayomba munonga nibagira bati: ‘Muhanikye aha muti.’ Bwanyima Pilaato akabaikiriza kumuhanika.

Bakatwara Yesu omu mwanya ogurikwetwa Gologosa, baamuhanika aha muti. Yesu akashaba ati: “Taata, obasaasire, ahakuba tibarikumanya ki barikukora.” Abantu bakateerera Yesu enaku nibagira bati: ‘Ku oraabe ori Omwana wa Ruhanga, hanuka orugye aha muti.’

Omwe aha nkozi z’ebibi owaabaire ahanikirwe aha rubaju rwe akagira ati: “Ku oriija omu Bukama bwawe, onyijukye.” Yesu akamuraganisa ati: ‘Noija kuba naanye omuri Paradiso.’ Omu ihangwe, ensi ekagira omwirima kumara eshaaha ishatu. Bamwe aha beegi be bakeemerera haihi n’omuti otwariremu Mariamu, nyina Yesu. Yesu akagambira Yohaana kureeberera Mariamu nka nyina.

Aha muheru, Yesu akagira ati: “Kyahwa.” Akainika omutwe kandi yaitsya ogw’aha muheru. Omu kaanya ako, hakabaho omutsitsa gw’amaani. Omuri hekalu, omukingo ogwabaire nigutaanisa omwanya Ogurikwera n’omwanya Ogurikwera Munonga  gukatagukamu kabiri. Omuserukare akagira ati: ‘Ogu kwo abaire ari Omwana wa Ruhanga.’