Inawit na saray manunan saserdote si Jesus diad palasyo na gobernador ya si Pilato. Tinepetan ira nen Pilato: ‘Antoy kasalanan to yan too?’ Inmebat ira: ‘Ibabaga to ya sikato so ari!’ Tinepetan nen Pilato si Jesus: “Sika so Ari na saray Judio?” Inmebat si Jesus: “Say Panarian ko et agkabiangan na sayan mundo.”

Impaiyakar nen Pilato si Jesus ed si Herodes, say manuuley ed Galilea, pian nanengneng no kasin walay naromog nen Herodes ya kasalanan nen Jesus. Anggapoy aromog nen Herodes ya kasalanan to kanian impaipawil tod si Pilato. Kanian imbaga nen Pilato ed totoo: ‘Anggapoy aromog mi nen Herodes ya kasalanan to yan too. Ibulos ko la.’ Balet inyeyag na totoo: “Patey mo! Patey mo!” Sinisiplatan na saray sundalo si Jesus, insan da nilutlutdaan, tan pinoponiti da. Kinoronaan da na saray sabit so ulo to tan ininsulto da, ya kuan da: ‘Maabig ya agew, Ari na saray Judio.’ Imbaga lamet nen Pilato ed saray totoo: ‘Anggapoy aromog kon kasalanan to yan too.’ Balet inyeyag da: “Ipasak mod poste!” Kanian pinmayag si Pilato ya pateyen si Jesus.

Inawit day Jesus diad lugar ya tatawagey Golgotha, impasak dad poste, insan da itan impaalagey. Impikasi nen Jesus: “Ama, perdonam ira, ta agda amtay gagawaen da.” Inelek-elekan na totoo si Jesus, a kuan da: ‘No Anak ka na Dios, epas kad satan ya poste! Iligtas moy sarilim.’

Walay sakey ya kriminal ya akapasak ed abay nen Jesus. Imbaga tod si Jesus: “Nonot mo ak sano onsabi kad Panarian mo.” Im-promise nen Jesus ed sikato: “Nakaiba ta ka ed Paraiso.” Nen kaagwan la, binmilunget ed interon dalin na taloran oras. Wala ray disipulo ya wadman ed asingger ed poste, kaibay Maria ya nanay nen Jesus. Imbilin nen Jesus ed si Juan ya asikasoen toy Maria tan ituring ton nanay to.

Insan imbaga nen Jesus: “Asumpal la!” Intuek toy ulo to insan la inatey. Diad saman et yinmegyeg na makmaksil. Amay ambelat ya kurtina ed templo diad baetan na Masanto tan Sankasantosan  et apilat ya nankadua. Imbaga na opisyal na saray sundalo: ‘Talagan Anak na Dios iya.’