De väaschte Priestasch brochten Jesus no dän Harscha Pilatus. Pilatus fruach dee: “Waut saul dis Maun jedonen haben?” Dee säden: “Hee sajcht von sikj, hee es een Kjennich!” Pilatus fruach Jesus: “Best du de Juden äa Kjennich?” Jesus auntwuad: “Mien Kjennichrikj es nich von dise Welt.”

Dan schekjt Pilatus Jesus no Herodes, dän Harscha von Galiläa, un wull seenen, aus dee waut jäajen Jesus funk. Herodes funk nuscht schlajchtet aun Jesus un schekjt dän trigj no Pilatus. Dan säd Pilatus to de Menschen: “Ekj un Herodes fungen beid nuscht jäajen disen Maun. Ekj woa dän frieloten.” De Menschen brelden: “Moak dän doot! Moak dän doot!” De Soldoten vepitschten Jesus, bejeiwaden dän un vekjielden dän. Dee saden dän eene Kroon von Spekjasch opp un spotten äwa dän: “Goondach, Kjennich von de Juden.” Pilatus säd wada to de Menschen: “Ekj finj bloos nuscht schlajchtet aun dän.” Oba dee brelden: “Aum Pol naun met dän!” Dan jeef Pilatus de Frieheit, daut Jesus dootjemoakt wort.

De Soldoten brochten Jesus no de Städ Golgata. Dee noagelden dän aun eenen Pol naun un rechten dän Pol opp. Jesus bäd: “Voda, hool dee daut togood, wiels dee weeten nich, waut see doonen.” De Menschen spotten äwa Jesus un säden: “Wan du Gott sien Sän best, dan komm vom Pol rauf! Rad die selfst.”

Eent von de Reiba, waut biesied Jesus honk, säd: “Denkj aun mie, wan du en dien Kjennichrikj kjemst.” Jesus vespruak dän: “Du woascht met mie em Paradies sennen.” No Meddach wort daut en daut Launt fa dree Stund diesta. Maria, Jesus siene Mame, un eenje aundre Jinja wieren doa biesied dän Pol. Jesus säd to Johanes, hee sull sikj om Maria kjemren, soo aus wan daut siene Mame wia.

Tolatst säd Jesus: “Nu es aules foadich jebrocht!” Hee honk sienen Kopp rauf un storf. Krakjt dan jeef daut een grootet Ieedbäben. De schwoare Gardien em Tempel tweschen de Heilje Stow un de Aulaheilichste  Stow reet enne Medd entwei. Een Aunjestalda äwa de Soldoten säd: “Dit wia werkjlich Gott sien Sän.”