Kuraj sacerdotesqa Jesusta Pilatoman pusarqanku. Pilatotaj paykunata nerqa: “¿Imamantá kay runata juchachashankichej?”, nispa. Paykunataj nerqanku: “Kay runaqa rey kasqanta nin”, nispa. Chayrayku Pilato Jesusta taporqa: “¿Qanchu judiospa reyninku kanki?”, nispa. Jesustaj nerqa: “Gobiernoyqa mana kay mundomanta gobiernos jinachu”, nispa.

Pilatoqa Galileamanta rey Herodesman Jesusta pusacherqa. Herodestaj Jesuspi ni ima juchata tarispa Pilatoman kutichiporqa. Pilatotaj runasman nerqa: “Ni Herodespis, ni noqapis kay runapi juchata tariykuchu, kacharipusaj”, nispa. Runastaj qhaparerqanku: “¡Wañuchiychej! ¡Wañuchiychej!”, nispa. Chantá soldadosqa Jesusta seqʼorqanku, thoqaykorqanku, sajmarqanku ima. Khishkamanta pilluta umanman churaykuspataj burlakorqanku: “Jallalla judiospa reynin”, nispa. Pilatotaj runasman nerqa: “Ni ima juchatapis paypi tarinichu”, nispa. Runastaj “¡kʼaspipi wañuchisqa kachun!” nispa qhaparerqanku. Pilatotaj Jesusta jaywaykorqa wañuchinankupaj.

Chantá Jesusta Gólgota nisqa lugarman pusaspa kʼaspiman clavaykorqanku. Jesustaj orakorqa: “Tatáy, paykunata perdonay. Mana yachankuchu imatachus ruwashasqankuta”, nispa. Runastaj burlakorqanku: “Diospa Wawan kaspaqa salvakuy á”, nispa.

Jesuspa ladonpi clavasqa kasharqanku chay suwasmanta ujnin, Jesusta nerqa: “Gobiernoykiman yaykuspa, noqamanta yuyarikunki ari”, nispa. Jesustaj nerqa: “Noqawan paraisopi kanki”, nispa. Tardeyaykuytataj kinsa horatapuni laqhayaykorqa. Jesuspa qayllanpitaj wakin yachachisqasnin qhepakorqanku, maman Mariapis. Jesusqa Juanta nerqa: “Mamay Mariata mamaykita jina cuidapuwanki”, nispa.

Chantá Jesusqa “juntʼakunña” niytawan umanta liwiykuspa wañuporqa. Chay ratotaj sinchʼi terremoto karqa, templopitaj Santo Lugarta, Aswan Santo Lugartawan tʼaqaj cortina khuskanmanta  llikʼikorqa. Chayraykutaj soldadospa capitannin nerqa: “Kay runaqa Diospa Wawanpuni kasqa”, nispa.