Precisaq sacerdötikunaqa Pilätu gobernanan wayinmanmi Jesusta apayarqan. Y Pilätuqa, “¿ima mana allitataq kë nuna rurashqa?” nirqanmi. Pëkunanam, “¡rey tukunmi!” niyarqan. Tsënam Pilätuqa, “¿judïukunapa reyninku kanki?” nishpa Jesusta tapurqan. Jesusnam, “Gobiernüqa manam kë mundupitatsu” nirqan.

Tsënam Pilätuqa Galilëata gobernaq Herödisman pasaratsirqan, porqui, “itsa pëqa imallatapis taripunqa” nirqanmi. Peru Herödispis manam ni imata taripurqantsu, tsëmi Pilätuman yapë kutiratsirqan. Tsënam Pilätuqa nunakunata kënö nirqan: “Manam ni Herödispis ni noqapis kë nunachö ima jutsatapis tariyätsu. Librim jaqirishaq”. Peru nunakunaqa büllarmi, “¡wanutsun! ¡Wanutsun!” niyarqan. Y soldädukunam astar, toqapur y maqar ushayarqan. Nïkurmi kashapita corönata peqanman churarkatsir, “¡buenos dias, judïukunapa reynin!” nirnin burlakuyarqan. Y Pilätuqa yapëmi nunakunata kënö nirqan: “Noqaqa manam ima jutsatapis kë nunachö tarïtsu”. Peru nunakunaqa, “¡qeruman clavatsi!” nirmi büllayarqan. Tsëmi Pilätuqa tsënö rurayänampaq pëkunata entreguëkurqan.

Tsënam Golgota nishqan sitiuman apayarqan. Y juk qeruman clavëkurmi tsëchö jaqiriyarqan. Jesusqa, “Teyta, perdonëki, porqui manam musyayantsu imata rurëkäyanqanta” nirmi Jehoväman mañakurqan. Y nunakunaqa, “¡Diospa Tsurin karqa, tsë qerupita yarpamï y salvakï!” nirmi burlakuyarqan.

Ishkë suwa nunakunam Jesuspa lädunchö clavaräyarqan, y juknin kaqmi, “Gobiernïkiman yëkurir yarpäramanki” nirqan. Jesusnam, “Shumaq Patsachömi noqawan kanki” nirqan. Tsë tardiqa kima hörapam patsa ampirarqan. Y wakin qateqninkunaqa Jesuspa mamänin Marïawan juntum Jesusta täparäyarqan. Y Jesusqa Juantam nirqan kikimpa mamänintanö Marïata cuidanampaq.

Wanunampaqna këkarmi Jesusqa, “¡cumplikärishqam!” nirqan. Nïkurmi warkukärir wanurirqan. Y tsë höram patsa alläpa feyupa kuyurqan. Y templuchö Santu Sitiutawan Alläpa Santu cuartuta rakeq  cortïnam ishkëman qashqakärirqan. Tsënam juk mandakoq soldädu, “këqa rasumpam Diospa Tsurin kashqa” nirqan.