Sacerdotecunata mandajcunaca Judea llajtata mandaj Pilatopajmanmi Jesusta pusharca. Chaipimi Pilatoca, ‘¿imatataj cai runaca rurashca?’ nijpi paicunaca, ‘rey cani ninmi’ nircacuna. Chaimi Pilatoca Jesustaca, ‘¿judiocunata mandajchu cangui?’ nishpa tapurca. Jesusca, ‘ñuca Mandanaca mana cai pachamantachu can’ nircami.

Qꞌuipaca Pilatoca Galileata mandaj Herodespajmanmi Jesusta cacharca. Chaipi paita juzgachun. Alli runa cashcata ricushpaca Herdodesca tigrami Pilatopajman cacharca. Chaipimi Pilatoca gentecunataca, ‘Herodespish ñucapish cai runa ima mana allita rurashcataca mana japinchijchu, richun saquigrinillami’ nirca. Pero gentecunaca caparishpami, ‘¡huañunatajmi can!’ nircacuna. Chashna nijpimi soldadocunaca Jesustaca macashpa, azotishpa chꞌucarcacuna. Paipaj umapipish casha coronata churachishpami, ‘judiocunata mandaj, allillachu cangui’ nishpa burlarircacuna. Cutinmi Pilatoca, ‘cai runa ima mana allita rurajtaca mana ricushcanichu’ nirca. Chashna nijpipish gentecunaca, ‘¡caspipi clavaichij!’ nishpami caparircacuna. Chaimi Pilatoca Jesusta huañuchichun entregarca.

Chai qꞌuipaca Gólgota nishca pushtumanmi Jesusta aparcacuna. Chaipimi paitaca shuj caspipi clavashpa huarcurcacuna. Jesusca, ‘Yayitu, paicunaca imata ruracushcataca mana yachancunachu, perdonapailla’ nircami. Gentecunaca, ‘¡Diospaj Churitaj cashpaca chai caspimanta uricushpa quishpiriyari!’ nishpami burlarircacuna.

Jesuspaj ladopi huarcushca shuj huañuchij runaca, ‘can mandacushpaca ñucata yuyaripangui’ nircami. Chaimi Jesusca, ‘canca paraisopimi causangui’ nirca. Chishiyajpica ñapishmi quimsa horasta amsayarca. Jesusta catijcunapuramanta huaquincunaca paipaj cꞌuchupimi saquirircacuna. Paipaj mama Mariapish chaipimi carca. Jesusca, ‘cambaj mamata shina Mariata cuidapangui’ nishpami Juanmanca mingarca.

Ña huañugricushpami Jesusca, ‘ñami pajtarishca’ nirca. Chashna nishpaca umata cumuchishpami huañurca. Chaipimi ñapish allpaca chujchurca. Taita Diospaj huasi ucupi jarcachishca linsopish jahuamanta urimanmi chaupirirca. Chaimi soldadocunata mandajca, ‘paica Taita Diospaj Churitajmari cashca’ nirca.