O glavna sveštenikija ingargje e Isuse ki e upraviteleskiri palata ko Pilat. Ov pučlja le: „Bašo so kerena krivo akale manuše?“ Ola vakergje: „Ov vakerela kaj tano cari!“ O Pilat pučlja e Isuse: „Dali sian tu o cari e Evreengoro?“ O Isus odgovoringja: „Mlo Carstvo nane delo taro akava sveto“.

Tegani o Pilat bičhalgja e Isuse ko Irod, o vladeteli ki Galileja, te dikhel dali ov ka arakhel nešto protiv leste. Adaleske so na arakhlja ništo protiv o Isus, ov bičhalgja le palem ko Pilat. Palo adava, o Pilat vakergja e narodoske: „Ni me ni o Irod na arakhlem ništo protiv akava manuš. Ka oslobodinav le“. Ama o manuša počmingje te vikinen: „Mudar le! Mudar le!“ Tegani, o vojnikija počmingje te kamšikujnen e Isuse, te čhungaren le hem te khuven le. Ko šero čhivgje leske kruna taro kare hem asandor vakerena leske sine: „Zdravo, care e Evreengoro“. O Pilat palem phengja e manušenge: „Na arakhljum ništo lošno ko akava manuš“. Ama, ola silno vikingje: „Kovin le ko stubo!“ Tegani, o Pilat naredingja o Isus te ovel mudardo.

O vojnikija ingargje e Isuse ko than so vikinela pe sine Golgota, kovingje le ko stubo hem ispravingje o stubo te tergjol. O Isus molingja pe: „Mo dad, prostin lenge. Na džanena so kerena“. O manuša asana sine e Isuseske hem vakerena sine: „Ako sian e Devleskoro Čhavo, huli taro stubo! Ajde, spasin tut“.

Jekh taro zlostornikija so sine kovimo uzi leste vakergja leske: „Setin tut ki mande keda ka ave ko tlo Carstvo“. O Isus vetingja leske: „Ka ove mancar ko raj“. Paloručko, ki celi phuv sine trin saatija temnica. Paše uzo stubo tergjona sine nekoj taro učenikija, maškar kola sine i Marija, i daj e Isuseskiri. O Isus vakergja e Jovaneske te arakhel leskere daja e Marija sar pli daj.

Ko krajo, o Isus vakergja: „Kergjum sa so rodingjan mandar!“ Teljargja po šero hem mulo. Ko adava momenti ulo baro zemjotres. Ko hrami, i phari zavesa so odvojnela sine o Sveto taro Najsveto  delo, pharavdili ko ekvaš. Jekh vojniko vakergja: „Ov čače sine e Devleskoro Čhavo“.