A-Prêtre-mokonzi ague na Jésus na ndo ti Gouverneur Pilate. Lo hunda ala, lo tene: ‘Tënë ti nyen la ala bi na li ti koli so?’ Ala tene: ‘Lo tene so lo yeke mbeni gbia!’ Pilate angbâ ahunda Jésus, atene: “Mo yeke Gbia ti aJuif?” Jésus akiri tënë, atene: “Royaume ti mbi ayeke ti dunia so pëpe.”

Pilate atokua Jésus na Hérode, so ayeke komande kodro ti Galilée, ti bâ wala lo yeke wara mbeni tënë na li ti Jésus. Hérode awara mbeni tënë na li ti Jésus ape na lo kiri lo tokua lo na Pilate. Na pekoni Pilate atene na azo ni, lo tene: ‘Mbi na Hérode kue e wara tënë oko na li ti koli so ape. Mbi yeke zi lo.’ Azo ni adekongo, atene: ‘Fâ lo! Fâ lo!’ Aturugu apika Jésus na zaza, ala tuku ngu ti yanga na terê ti lo, na ala boxé lo. Ala yü na li ti lo mbeni couronne so a leke ni na akamba ti kî, na ala he lo, ala tene: ‘Bara mo, gbia ti aJuif.’ Pilate atene na azo ni, lo tene: ‘Mbi wara tënë na li ti koli so ape.’ Me azo ni adekongo, atene: “Fâ lo na ndö ti keke!” Tongaso, Pilate azia Jésus na maboko ti ala ti tene ala fâ lo.

Azo ni ague na Jésus na mbeni place so a iri ni Golgotha, ala pika lo na pointe na ndö ti mbeni keke, na ala yô keke ni na nduzu. Jésus asambela, lo tene: ‘Babâ, pardonné ala, ndali ti so ala hinga ye so ala yeke sara so ape.’ Azo ahe Jésus na ngia, ala tene: ‘Tongana mo yeke Molenge ti Nzapa, londo na ndö ti keke so mo descend ma! Sö mo wani e bâ!’

Mbeni oko ti azo ti sioni so akanga nga lo na terê ti Jésus atene: “Dabe ti mo na mbi tongana mo lï na yâ ti Royaume ti mo.” Jésus amû zendo na lo, atene: “Mo yeke duti ande na mbi na Paradis.” Na peko ti midi, mbeni vukongo ndo so aninga l’heure ota amû ndo ni kue. Ambeni disciple aduti nduru na terê ti keke ni, Marie, mama ti Jésus kue ayeke nga dä. Jésus atene na Jean ti bâ lege ti Marie tongana mama ti lo wani.

Na nda ni, Jésus atene: “Ye kue ahunzi awe!” Lo ba li ti lo na sese na lo wu tanga ti pupu ti lo. Mo ye ti bâ, sese ayengi ngangu. Na yâ ti temple, nengo rideau so ayeke na popo ti Ndo so ayeke nzoni-kue  nga na Ndo so ayeke nzoni-kue kue kue, yâ ni asuru na milieu. Mbeni turugu ti kota kamba angbâ atene: ‘Ti tâ tënë ni, lo yeke Molenge ti Nzapa.’