Kakkalaanote roorrooti Yesuusa gashshaanchu minira haadhe massitino. Philaaxoosi ‘Kuni manchi mayi bunshe assino?’ yee xaˈmi. Insano, ‘Isi ani mootete yiino’ yitu. Hakkiinni Philaaxoosi Yesuusa, “Ati Ayihudete Mooteeti?” yee xaˈmi. Yesuusino ‘Ane Mangiste tenne alameta diˈˈikkitino’ yee qoli.

Hakkiinni Philaaxoosi Yesuusa Galiilu gashshaanchiwa Heroodiisiwa soyi; isi Yesuusa hakka soyinohu Heroodiisi Yesuusi bunshe assinoronna teˈee buuxanno gedeeti. Heroodiisi Yesuusi loosino bunshe nookkita afiti, iso galagale Philaaxoosiwa soyi. Hakkiinni Philaaxoosi mannaho togo yii: ‘Heroodiisino anino kuni manchi loosino bunshe hanse hoongoommo. Konni daafira iso tireemmo.’ Mannu kayinni ‘Iso shinona! Iso shinona!’ yee canci. Olanto Yesuusa halangetenni gantino, anja aanaho tuffinosi, hattono baqqaalla qawaaddinosi. Hakkiinni insa isira utu worraaqqa seekkite umoho worte, ‘Ayihudete Moote, keere nootto?’ yitanni haariintinosi. Philaaxoosi xaano mannaho, ‘Kuni manchi assino bunshe diafoommo’ yii. Insa kayinni “Suti! Suti!” yitanni cancitu. Konni daafira, Philaaxoosi Yesuusa shitanno gede sayise uyinsa.

Insa Yesuusa Golgoota yinanniwa haadhe hadhu; hakkiinni misimaaretenni haqqaho qolte gante suttinosi. Hakkiinni Yesuusi togo yee huuccatto assino: ‘Annaˈya, diaffe assitanni noona gatona yiinsa.’ Mannu ‘Ati Maganu Beettootiro, hanni haqqu aaninni dirrite umokki gatisi’ yee hariiminosi.

Yesuusi mule sutantinori giddo mittu ‘Mangistekkinni daatto woyite qaagie’ yii. Yesuusi iso “Ane ledo Gannatete heeˈratto” yiinosi. Hakko barra, sase saate woˈma gobba tunsitu. Yesuusi ama Maariyaaminna wole rosaanosi Yesuusi sutamino haqqi mule uurrite no. Yesuusi Yohaannisira Maariyaami umisi ama gede asse towaatanno gede kulino.

Jeefote Yesuusi ‘Xaate woˈmino’ yee coyiˈri. Hakkiinni isi umosi heeshshi asse jeefote foole fooli. Hakkawoyite, baatto lowo geeshsha huxidhino. Qullaawu mini dukkono lamewa dadhantu. Olantote roorrichi, “Kuni manchi halaalinta Maganu Beettooti” yii.