Baphristi labakhulu bamikisa Jesu esigodlweni sembusi. Pilatu wababuta watsi: ‘Yini leyentiwe ngulendvodza?’ Batsi: ‘Itsi iyinkhosi.’ Pilatu wabuta Jesu watsi: ‘UyiNkhosi yemaJuda yini?’ Jesu waphendvula watsi: ‘UMbuso wami akusiwo walelive.’

Ngako Pilatu watsi Jesu akamikiswe kuHerodi inkhosi yaseGalile kuze atewubona kutsi kukhona yini lokubi lokwentiwe nguJesu. Herodi watfola kutsi kute lokubi lebekakwentile, wase utsi akabuyiselwe emuva kuPilatu. Ngako Pilatu watsi kulabantfu: ‘Mine naHerodi sitfole kutsi kute lokubi lokwentiwe ngulendvodza. Ngitayikhulula.’ Bantfu bamemeta batsi: ‘Mbulale!’ Emasotja ashaya Jesu ngensilane, amkhafulela futsi amkhahlela. Eluka umchele wemanyeva amfaka wona enhloko, futsi ahlekisa ngaye atsi: ‘Sawubona, wena Nkhosi yemaJuda!’ Pilatu waphindze watjela labantfu watsi: ‘Kute lokubi lokwentiwe ngulendvodza.’ Kodvwa bamemeta batsi: ‘Mbetsele!’ Pilatu wagcine avumile kutsi Jesu abulawe.

Bahamba naJesu baya eGolgotha, bafike bambetsela elugodvweni. Jesu wathantaza watsi: ‘Babe, bacolele ngobe abakwati labakwentako.’ Bantfu bahlekisa ngaJesu batsi: ‘Nangabe uyiNdvodzana yaNkulunkulu, yehla lapho elugodvweni, utisindzise.’

Lomunye lebekabetselwe eceleni kwakhe watsi: ‘Ungikhumbule nawufika eMbusweni wakho.’ Jesu wametsembisa watsi: ‘Utawuba nami ePharadisi.’ Emini yantsambama, kwaba mnyama emhlabeni wonkhe kwate kwaphela ema-awa lamatsatfu. Labanye bafundzi baJesu bema edvute nelugodvo kanye naMariya make waJesu. Jesu watjela Johane kutsi abonakekela Mariya amtsatse njengamake wakhe.

Ekugcineni Jesu watsi: ‘Sekufezekile!’ Wase ubhekisa inhloko yakhe phansi wadvonsa umoya kwekugcina. Kusenjalo, kwatamatama umhlaba. Indvwangu yasethempelini leyehlukanisa iNgcwele neNgcwelengcwele  yadzabuka ekhatsi. Indvuna yemasotja yatsi: ‘Lomuntfu abeyiNdvodzana yaNkulunkulu.’