Owandji w’ɛlɔmbɛdi akɔshi Yeso ko akɔtɔlɛ otsha lo luudu laki nguvɛrnɛrɛ. Pilato akawambola ate: ‘Dui diakɔna diafundanyu pami kɛnɛ?’ Vɔ wakate vate: ‘Nde ekɔ lo ndjata dia nde ekɔ nkumekanga!’ Pilato akambola Yeso ate: “Onde wɛ kele Nkumekanga k’ase Juda?” Yeso akakadimola ate: “Diolelo diami bu dia l’andja ɔnɛ.”

Ko Pilato akatome Yeso le Hɛrɔdɛ, owandji wa Ngalileya dia tenda kana nde koka mbotana l’onongo. Hɛrɔdɛ kɔmɛna ndooko dikambo dia kɔlɔ le Yeso, ko nde akookaloya le Pilato. Oma laasɔ Pilato akatɛ anto ate: ‘Oyadi Hɛrɔdɛ kana dimi hatotanyi ndooko onongo le pami kɛnɛ. Dimi layanga mbokimɔ.’ Olui w’anto wakate la dui dia wolo vate: ‘Diakande! Diakande!’ Asɔlayi wakakɔmɔla Yeso mfimbɔ, wakawotɛ nsɔyi ndo wakɔkɔmɔla. Vɔ wakɔɔlɔtsha lofulɛ l’atɛndɛ l’ɔtɛ ndo wakɔsɔkɛ wata vate: ‘He mɔyɔ, nkumekanga k’ase Juda.’ Pilato akatɛ olui w’anto nto ate: ‘Dimi hatanyi ndooko dui dia kɔlɔ le pami kɛnɛ.’ Koko vɔ wakate la dui dia wolo vate: “Hanɛnde l’otamba!” Ko Pilato akookimɔ dia nde ndjakema.

Vɔ wakɔshi Yeso ko wakatshu la nde lo dihole diakawelɛka Gɔlgɔta, wakɔɔkɔkɔla nsɛti l’otamba ko wakawemɛ. Yeso akalɔmbɛ ate: ‘Papa, dimanyiyawɔ, nɛ dia vɔ haweye kɛnɛ kasalawɔ.’ Anto wakɔlɛ Yeso wata vate: ‘Naka wɛ ekɔ Ɔna Nzambi, oholɔ oma l’otamba! Yashimbɛɛ.’

Otshi wa kɔlɔ ɔmɔtshi lakahanema suke la nde akawotɛ ate: “Yeso, kombohɔ lam’ayoyonga lo Diolelo diayɛ.” Yeso akoolake ate: “Wɛ ayoyala la mi lo Paradiso.” L’ɔkɔngɔ wa midi, wodjima wakonge l’edja ka wenya esato wa tango lo wodja w’otondo. Ambeki amɔtshi wakemala suke l’otamba, mbidja ndo Mariya wa nyango Yeso. Yeso akatɛ Joani dia nde kokɛka Mariya oko tshondo ya nyango hita.

L’ekomelo, Yeso akate ate: “Diambokotshama!” Nde akakɔlɛ ɔtɛ ko akakitshiya lomu. L’etena kɛsɔ, didimu dia nkɛtɛ dia wolo diakayala. Lo tɛmpɛlɔ, dihɔndɔ di’okombɔ dia wotsho  diakakakitolaka Dihole di’Ekila la Dihole dioleki Ekila diakaatɛ l’ahende. Owandji ɔmɔtshi w’asɔlayi akate ate: ‘Ɔnɛ mɛtɛ aki Ɔna Nzambi.’