Muthangeyi nya vapristi a di dzega Jesu a hongola naye nyumbani ga ghovhernadhori Pilato. Pilato a di va wudzisa khuye: ‘Ginani a nga ghoha mwama yoyu?’ Avo khavo: ‘Wari khuye pfhumu!’ Pilato a di wudzisa Jesu, khuye: ‘Khuwe Pfhumu nya Vajudha?’ Jesu a di hlamula, khuye: ‘Mufumo wangu khandri wa mafuni momu.’

Khavbovbo, Pilato a di rumeya Jesu a hongola ga Herodhi, pfhumu ya Galileya, gasi a ya mu phasa gu khedza nandru a gu nawo Jesu. Herodhi kha wona nandru nya gilo ga Jesu. Khu kharato, a di mu bweledza ga Pilato. Pilato a di vbedza a embeya vathu, khuye: ‘Eni ni Herodhi kha hi woni nandru nya gilo ga mwama yoyu. Nyo vbweta gu mu diga a hongola.’ Vathu va di ganeya khu lito nyo khugege, khavo: ‘Mu songe! Mu songe!’ Masotshwa ma di veta Jesu khu gisepho, ma mu thureya ma bwe ma mu veta dzipama. Ma di luga miba ma mu ambigisa hungoni, ma mu tsorodzeya, khayo: ‘Sewe Pfhumu nya Vajudha.’ Pilato a di embeya gambe vathu, khuye: ‘Gwangu mwama yoyu mwalo nandru.’ Ganiolu, va di ganeya khu lito nyo khugege, khavo: ‘A na khokhothedwe avba nya simbo.’ Khu kharato, Pilato a di mu ningeya gasi a songwa.

Masotshwa ma di dzega Jesu ma hongola naye ga wulanga wu ranwago pwani Goligota, ma ya mu khokhotheya avba nya simbo, va vbedza va wu tsitsa. Jesu a di gombeya, khuye: ‘Papayi, va divaleye kholu kha va siti esi va girago.’ Vathu va di poyileya Jesu, khavo: ‘Wo ba uri Gyanana gya Nungungulu, tshiga khu vbasimbotunu vbovbo! Dzi vbulugise.’

Gighevenga gimwego gi nga ba gi khokhothedwe vbafuvbi ni Jesu, gi di mu embeya khigyo: ‘Nyo lomba gu kheni u nyi dundruga tepo u na beyago Mufumoni wago.’ Jesu a di gi tumbisa, khuye: ‘U na ba uri ni eni Paradhesini.’ Ni siyambo sakona, gu di manega gidema tigoni gwatshavbo khu tanga nya dziora dzitharu. Vapizane nyo khaguri va Jesu gumogo ni Mariya mamayi waye, va di emide vbafuvbi ni simbo a nga ba a khokhothedwe ga uwo. Jesu a di lomba Johane gu khuye a sayisa Mariya, a mu sayisa nga khatshi mamayi waye.

Khu guhegisa, Jesu a di khuye: ‘Si tadzisegide!’ A di nogisa hungo, a hefemula khu tepo nyo hegise. Khu tepo yoyo, mafu ma di hanahana ngudzu. Kortina nyo lemeye ya omu nya tempele yi hambanisago wulanga  nya Guage ni owu nya Guage Ngudzu, yi di pferuga khu vbakari. Pfhumu nyo khaguri nya masotshwa yi di khiyo: ‘Khu lisine egi gi diri Gyanana gya Nungungulu.’