Ja olomalik bʼa sacerdote yiʼaje och ja Jesús ja bʼa snaj ja gobyerno. Ja tiw ja Pilato sjobʼoyile: «¿Jasa smul wa taʼunejexyi ja winik it?». Ti sjakʼawe: «¡Wa xyala kʼotel mandaranum!». Ja Pilato sjobʼoyi ja Jesús: «¿Weʼn maʼ kʼotela ja smandaranum ja judíoʼiki?». Ja Jesús sjakʼayi: «Ja jGobyerno mi sbʼajuk ja bʼa luʼumkʼinal it».

Jaxa Pilato sjeka ja Jesús ja bʼay ja Herodes, ja gobyerno bʼa Galilea, bʼa oj yil ta oj stayi smul. Ja Herodes mi bʼobʼ stayi smul ja Jesús sok cha ya kumxukyi ja Pilato. Anto ja Pilato yalyabʼ ja ixuk winik: «Ja Herodes soka keʼn mi xtaʼatikon smul ja winik it. Ojni ka wajuk libre». Pe ja ixuk winike awaniye: «¡Mila! ¡Mila!». Ja kʼakʼanumik yaweyi tsʼuʼum, stsujbʼane sok smakʼawe. Yawe ochyi ja bʼa yolom jun corona bʼa ay skʼiʼixil sok jachta wane stseʼlajel: «¡Saʼan, smandaranum ja judíoʼik!». Ja Pilato cha yalyabʼ ja ixuk winik: «Ja keʼn mi xtaʼayi smul ja winik it». Pe ja yeʼnle awaniye: «¡Aʼa lokan bʼa teʼ!». Jaxa Pilato yaʼa bʼa skʼabʼe bʼa oj smil-e ja Jesús.

Ja yeʼnle yiʼaje och ja Jesús bʼa jun lugar sbʼiʼil Gólgota. Stsʼapaweyi sklaboʼil bʼa jun teʼ sok ti yaʼawe lokan tiw. Ja Jesús yayi orasyon: «Tat, aʼa perdon ja yeʼnle yujni mi snaʼawe ja jas wane skʼulajel». Ja ixuk winik wanexta yixtalajel jachuk: «¡Ta kʼotela Yunin Dyos, koʼan ja bʼa lokana sok kolta abʼaj!».

June ja winik staʼunej smul ti lokan ekʼ bʼa stsʼeʼel ja Jesús yala: «Ajuluka kʼujol bʼa keʼn ja yajni la och ja bʼa wa Gobyerno». Ja Jesús skʼapayi: «Ti oj ajyan jmok ja bʼa Kʼachinubʼ». Ja bʼa och kʼakʼu, kʼikbʼi oxe ora. Jujuntik ja snebʼuman ti kanye tekʼan bʼa stsʼeʼel ja bʼa lokan ekʼi, tey ja María, ja snan ja Jesús. Ja Jesús skʼanayi ja Juan a-stalna ja María sok ayil jastal mero snan.

Tixa yala ja Jesús: «¡Chʼak kʼotuk smeranil!». Ya koʼuk tinan ja yolomi sok tixa chama. Ja bʼa jutsʼin jaw, ajyi jun tsatsal terremoto. Ja niwan kortina bʼa templo wa spila ja lugar Sak soka bʼa lugar Jel Saki chʼi snalan. Anto, jun olomal bʼa kʼakʼanum yala: «Ja it merani lek kʼotel Yunin Dyos».