Өргээниң улуг бараалгакчылары Иисусту чагырыкчының ордузунга эккелген. Пилат олардан: «Бо кижини чүү чүвеге буруудадып тур силер?» — деп айтырган. Олар аңаа: «Ол бодун хаан мен деп тур!» — дээн. Пилат Иисустан айтырган: «Сен иудейлерниң хааны сен бе?» Иисус: «Мээң Чагыргам бо делегейден эвес» — деп харыылаан.

Ынчан Пилат Галилеяның чагырыкчызы Иродче Иисусту ооң буруу, буруу чогун тодарадыр кылдыр чоргузупкан. Оон Ирод Иисустуң кандыг-даа буруу чогун көргеш, Пилатче дедир чоргузупкан. Пилат улуска: «Мен-даа, Ирод-даа бо кижини буруулуг деп санавайн тур бис. Бо кижини хостаптайн» — дээн. Ынчалза-даа улус: «Ону өлүрер! Өлүрер!» — деп алгыржып эгелээн. Дайынчылар Иисусту кымчы-биле эттеп-соп, олче дүкпүрүп, ону шанчып турган. Олар Иисустуң бажынга тенниг харагандан кылган оваадайны кедиргеш: «Иудейлерниң хааны алдаржызын» деп кочулап, куду көрүп турган. Пилат чонга база катап: «Бо кижиде кандыг-даа буруу чок-тур» — деп чугаалаан. Ынчалза-даа олар: «Ону шаажылаңар!» — деп алгыржып-ла турган. Ынчан Пилат ону шаажылаарын дужааган.

Иисусту Голгофа деп черже эккелген. Ону чагыга кадааш, азып каан. Иисус: «Ачай, оларны өршээп көр. Олар чүнү кылып турарын билбес-тир» — деп мөргүп эгелээн. Улус Иисусту шоодуп: «Сен Бурганның Оглу болзуңза, чагыдан дүжүп келгеш, бодуңну камгала!» — деп турганнар.

Ооң чанынга азып кааш турган дээрбечилерниң бирээзи дилээн: «Чагыргаң чедип кээрге, мени сактып кээп көрем». Иисус аңаа: «Мээң-биле кады дываажаңга турар сен» — деп аазаан. Дүъште ол черге үш шак ишти дүмбей караңгы дүжүпкен. Чамдык өөреникчилер чагының чанынга турган. Оларның аразынга Иисустуң авазы Мария база турган. Иисус Марияның дугайында, бодунуң авазы дег, сагыш човаарын Иоанндан дилээн.

Ам-на Иисус: «Боттаны берди!» — дээн. Ооң амы-тыны үстү бээрге, бажы халаш дээн. Ол-ла дораан дыка күштүг чер шимчээшкини болган. Бурганның өргээзинге Ыдыктыг өрээл биле Эң ыдыктыг  өрээлдиң аразынга азып кааш турган аар көжеге ийи чара орлу берген. «Бо шынап-ла Бурганның Оглу турган-дыр!» — деп, бир рим дайынчы алгырган.