Ovitunda via velapo, viambata Yesu toke kelombe lia nguluvulu. Pilato wa va pula hati: ‘Ocina cipi cĩvi ulume u a linga?’ Ovo vo tambulula vati: ‘Eye o kasi oku litukula hati, ndi soma!’ Pilato wa pula Yesu hati: “Ove Soma ya va Yudea?” Yesu wa tambulula hati: “Usoma wange ka wa tiamẽlele koluali lulo.”

Noke Pilato wa tuma Yesu ku Herode ombiali yo ko Galilea, nda okuti o sanga eko limue kokuaye. Herode ka sangele eko lalimue ku Yesu kuenje wo tuma vali ku Pilato. Pilato wa sapuila omanu hati: ‘Ci kale Herode ci kale ame ka tua sangele eko lalimue kulume u. Ame ndu yovola.’ Owiñi wa kaluka hati: ‘A pondiwe! A pondiwe!’ Asualali va veta Yesu losikote, vo siyila kuenda vo veta olonuku. Ovo vo kapa ekolowa liolosongo kutue waye kuenje va fetika oku u yola epembe vati: “Kalunga, a Soma ya va Yudea.” Pilato wa sapuila vali owiñi hati: ‘Ame sia sangele eko lalimue kulume u.’ Pole, ovo va kaluka vati: “A valeliwe kuti!” Kuenje Pilato wa eca Yesu oco a pondiwe.

Ovo vambata Yesu kocitumãlo cimue ci tukuiwa hati Gongota kuenje vo valela kuti umue kuenda uti waco va u talamisa. Yesu wa likutilila hati: “A Tate, va ecela, momo ka va kũlĩhĩle eci va kasi oku linga.” Omanu vo yola epembe loku popia vati: ‘Nda Vumõla a Suku loka kuti! Lipopela ove muẽle.’

Pole, ongangala yimue ya kala ocipepi la Yesu, ya popia hati: “Njivaluke eci iñila Vusoma wove.” Yesu wo likuminya hati: “O ka kala kumue lame Vocumbo Celau.” Kelivala lio kekumbi, kueya owelema umue wa kala olowola vitatu vofeka yaco yosi. Olondonge vimue via talama ocipepi luti wekangiso wa Yesu, oku kongelamo Maria ina ya Yesu. Yesu wa sapuila Yoano oco a tate Maria ndu okuti ina yaye muẽle.

Oku sulako, Yesu wa popia hati: “Ca tẽlisiwa!” Eye wa petamisa utue waye kuenje wa tula omuenyo. Vepuluvi liaco, kueya ocilemawe cimue cinene. Vonembele, ongumbo ya tepisile Ohondo yi Kola  Lohondo Yikola Koku Kola, ya toka volonepa vivali. Kesongo umue wolohoka wa popia hati: ‘Ocili, u wa kala muẽle Omõla a Suku.’