Vhotshifhe vhahulu vho dzhia Yesu vha mu isa nḓuni ya muvhusi. Pilato a vha vhudzisa a ri: ‘Uyu munna ni khou mu pomoka mini?’ Vhone vha ri: ‘U ri ndi ene khosi!’ Pilato a vhudzisa Yesu a ri: “Naa ni Khosi ya Vhayuda?” Yesu a ri: “Muvhuso wanga a si tshipiḓa tsha ḽino shango.”

Pilato o mbo ḓi rumela Yesu kha Herode, muvhusi wa Galilea, u vhona arali a tshi nga mu vhona mulandu. Herode ho ngo wana tshithu tsho khakheaho nga ha Yesu nahone a mu humisela ha Pilato. Nga zwenezwo, Pilato a vhudza vhathu a ri: ‘Nṋe na Herode a ro ngo wana tshithu tsho khakheaho kha hoyu munna. Ndi ḓo mu vhofholola.’ Gogo ḽa vhidzelela ḽa ri: ‘Mu vhulaheni! Mu vhulaheni!’ Maswole a mbo ḓi rwa Yesu nga tshimebi, a mu pfela nga mare na u mu huvhadza. Vha mu ambadza khare ya mipfa kha ṱhoho nahone vha mu goḓa vha ri: ‘Ḓuvha ḽavhuḓi, Khosi ya Vhayuda.’ Pilato a dovha a vhudza gogo a ri: ‘A tho ngo wana tshithu tsho khakheaho kha hoyu munna.’ Fhedzi vha vhedzelela vha ri: “Kha ombelwe kha danda!” Pilato o mbo ḓi vha ṋekedza ene uri vha mu ombele.

Vho isa Yesu fhethu hune ha pfi Golgotha, vha mu ombela kha danda nahone vha ḽi imisa. Yesu o rabela a ri: “Khotsi, vha hangwele, ngauri a vha ḓivhi zwine vha khou zwi ita.” Vhathu vha kolela Yesu vha ri: ‘Arali ni murwa wa Mudzimu, itsani kha iḽo danda! Ḓitshidzeni.’

Muṅwe wa vhaitazwivhi we a vha o ombelwa tsini nae a ri: “Ni nkhumbule musi ni tshi dzhena Muvhusoni waṋu.” Yesu a mu fulufhedzisa a ri: “Ni ḓo vha na nṋe Paradisoni.” Nga masiari, ha mbo ḓi vha na swiswi ḽihulu shangoni ḽoṱhe ḽe ḽa fhedza awara tharu. Vhaṅwe vha vhafunziwa vho vha vho ima tsini na danda, u katela na Maria, mme a Yesu. Yesu o vhudza Yohane uri a ṱhogomele Maria u tou nga u khou ṱhogomela mme awe.

Mafheleloni, Yesu a ri: “Zwo ḓadzea!” A kotamisa ṱhoho yawe nahone a fa. Nga tshenetsho tshifhinga, ha mbo ḓi vha na mudzinginyo muhulu. Labi ḽi lemelaho ḽa thembeleni ḽe ḽa vha ḽi vhukati ha fhethu Hukhethwa na Hukhethwa-khethwa  ḽa kheruwa nga vhukati. Mulangammbi a amba a ri: “Vhukuma uyu o vha e Murwa wa Mudzimu.”