Aalupale a anamukuttho yaahimuroiha Yesu owannyawe guvernatoro. Pilato aahikoha wira: ‘Mulopwana ola otthenkeni?’ Awo yaahaakhula wira: ‘Ola oniipaka okhala mwene!’ Pilato aahimukoha Yesu wira: ‘Nyuwo mwa Mwene a aYuda?’ Vano Yesu aahaakhula so: ‘Omwene aka khuhiyo wa vathi-va’.

Nto Pilato aahaaruma atthu omuroiha Yesu wa Herodi, yoowo aari namalamulela a oGalileya, ophavelaka omphwanyana mulattu Yesu. Masi Herodi khamphwanyanne mulattu, nto aahimuhokoloxerya wa Pilato. Vano Pilato aahaaleela atthu ale wira: ‘Hata Herodi khamphwanyanne mulattu mulopwana ola. Nto miyo kinoomutaphula’. Muttitthi wa atthu waahikhuwela ohimyaka so: ‘Aiviwe! Aiviwe!’ Atoropa yaahimmana Yesu ni ekopo. Yaahinwariha ekhara ya miiwa mmuruni ni yaanimutheya ariki: ‘Mooxeleliwa, Mwene a aYuda!’ Pilato aahaaleela-tho atthu ale wira: ‘Nkimphwanyanne mulattu mulopwana ola’. Masi atthu yaahikhuwela so: ‘Akhomeliwe vamwirini!’ Vano Pilato aahihimya wira Yesu akhomeliwe.

Awo yaahimurowana Yesu opuro waitthaniwa oGólgotha, yaahimukhomela vamwirini ni yaaheemexa mwiri owo. Yesu aahinvekela Muluku ohimyaka so: ‘Tiithi, mwaalevelele, khansuwela eniira aya’. Atthu yaninveeha Yesu ehimyaka so: ‘Waari Mwaana a Muluku, okhuruwe vamwirini-vo! Wiisoopole mmansawo!’

Mulavilavi mmosa aakhomeliwe hoothe ni Yesu aahinvekela Yesu wira: ‘Mukuupuwele mwaphiya momweneni mwanyu’. Yesu aahimuleiherya so: ‘Munrowa okhala ni miyo oParayiisu’. Othana eriyari, nsuwa naahittipha, vano elapo yotheene yaahikhumelela ewiriphi mpakha makaaripi. Awiixutti akina yaaheemela waattamela opuro aakhomeliwe awe Yesu, omuhela muhina Maria maama awe Yesu. Yesu aahimuleela Yohani wira amukhapeleleke Maria, maama awe.

Nuumala-vo, Yesu aahihimya so: ‘Sotheene soomaliheriwa’. Owo aahuuramiha muru awe, nto khukhwa. Okathi ene yoowo yaahikhumelela etetere. Mutemplo, ekortina yoolemela yeeyo yaakhala eriyari ya Nipuro Noowaarya ni Nipuro Nowaaryexa yaahikhereya eriyari.  Muulupale mmosa a anakhotto aahihimya so: ‘Veekeekhai, mulopwana ola aari Mwaana a Muluku’.