Gindara hi Jesus han punoan nga mga saserdote ngadto ha palasyo han gobernador. Ginpakianhan hira ni Pilato: ‘Ano an iyo akusasyon kontra hini nga tawo?’ Binaton hira: ‘Nasiring hiya nga hadi hiya!’ Ginpakianhan ni Pilato hi Jesus: “Ikaw ba an Hadi han mga Judio?” Hi Jesus binaton: “An akon ginhadian diri dinhi hini nga kalibotan.”

Katapos, iginpadara ni Pilato hi Jesus ngadto kan Herodes nga magmarando han Galilea basi hibaroan kon may makita hi Herodes nga sayop kan Jesus. Waray nakita hi Herodes nga sayop salit iginbalik niya hi Jesus kan Pilato. Kahuman, ginsidngan ni Pilato an mga tawo: ‘Ako ngan hi Herodes waray nakita nga sayop hini nga tawo. Bubuhian ko hiya.’ An mga tawo nan-gugliat: ‘Pataya hiya! Pataya hiya!’ Ginlatigo hi Jesus han mga sundalo, gintuprahan, ngan ginbalbag. Ginbutangan nira hin korona nga mga tunok an iya ulo ngan nakakatamay nga nagsiring: ‘Maopay nga adlaw, Hadi han mga Judio.’ Ginsidngan utro ni Pilato an mga tawo: ‘Waray ako nakita nga sayop hini nga tawo.’ Pero ginuliat hira: “Igraysang hiya ha kahoy!” Salit iginhatag hiya ni Pilato basi patayon.

Gindara nira hi Jesus ha lugar nga gintatawag nga Golgota, iginraysang hiya ha kahoy, ngan igin-usok ito. Hi Jesus nag-ampo: ‘Amay, pasayloa hira, kay diri hira maaram han ira ginbubuhat.’ Gintinamay hi Jesus han mga tawo nga nasiring: ‘Kon ikaw an Anak han Dios, lusad hito nga kahoy! Talwasa an imo kalugaringon.’

Usa han mga kriminal nga iginraysang kasapit ni Jesus an nagsiring ha iya: “Hinumdumi ako kon aadto ka na ha imo Ginhadian.” Hi Jesus nagsaad ha iya: “Makakaupod ko ikaw ha Paraiso.” Pagkakulop, nagsirom an bug-os nga tuna ha sulod hin tulo ka oras. An pipira han mga disipulo natukdaw hirani ha pasakitan nga kahoy, upod na hi Maria nga nanay ni Jesus. Ginsidngan ni Jesus hi Juan nga atamanon hi Maria sugad hin iya kalugaringon nga nanay.

Ha urhi, hi Jesus nagsiring: “Natuman na!” Dinuko hiya ngan nawad-an hin gininhawa. Hito nga takna, nagkaada makusog nga linog. Ha templo,  nagisi an mabug-at nga kurtina butnga han Baraan ngan han Pinakabaraan. Usa nga sundalo an nagsiring: ‘Ini gud an Anak han Dios.’