Nindesindro sefony pisoron̈o aby io tamy lapany governera tan̈y Jesosy. Pilato nan̈ontany iro: ‘Ino ma raha nataony lelahy io taminaro?’ Ho iro: ‘Izy niaboko izy panjaka!’ Pilato nan̈ontany Jesosy: “Anao ma Panjakany Jiosy?” Jesosy nivolan̈a: “Fanjakan̈anaka tsy an̈isany donia ty.”

Jesosy nalefany Pilato taminy Heroda, manampahifan̈a ta Galilia, hizahavan̈a hevitry Heroda momba izy. Heroda tsy nahita raha hivolan̈ana izy foeky, ke izy nampodiny tamy Pilato tan̈y. Ho Pilato taminolo aby io: ‘Zahay roeny Heroda, samy tsy nahita hadisovan̈a tamy lelahy ty foeky. Havotsoko izy.’ Fa olo nandronton̈o: ‘Vonia izy e! Vonia!’ Nivilezindro maramila aby io karavasy Jesosy, nandrorandro, sady nivangoendro hondry. Nisy satroko fatsiky nasaron̈ondro tamy lohanany. Nankadalaindro karaha ty amy zay izy: ‘Karakory ma Panjakany Jiosy e!’ Nivolan̈a ndraiky Pilato: ‘Izy kony tsisy raha ratsy nataony e.’ Fa iro nandronton̈o: “Fantsiha aminy hazofijalian̈a izy!” Ke izy nirahiny Pilato nivonen̈a.

Nindesindro ta Golgota Jesosy baka tio, nifantsihindro tamy kakazo, baka io kakazo io natsanganandro. Jesosy nivavaka: ‘Baba, mamilà iro anao, fa tsy haindro raha ataondro.’ Nankadalaindro Jesosy. Nivolan̈indro: ‘Anao koa Zanaka Zan̈ahary, mijotsoa! Avota ain̈inao!’

Nisy olo dahalo aroe nahanton̈o narikitry Jesosy. Araiky tamindro nivolan̈a: “Mba tsarova zaho lera anao avy amy Fanjakan̈anao.’ Ho Jesosy: “Anao hiaraka aminaka amy Paradisa an̈y.” Mbala folakandra tamy zen̈y, fa nahiziky tany jiaby tan̈atiny telo lera. Nitsangana narikitry tio pianatra Jesosy sasany, an̈isanizen̈y Maria, mamany Jesosy. Maria nirahiny Jesosy nikarakarainy Jaona, hataony mira mamany niteraka izy in̈y.

Farany, Jesosy nivolan̈a: “Vita!” Izy baka tio niondriky in̈y, izy efa naty edy. Nisy horohorontany mare tamy zen̈y. Nisaraka aroe rido be  nan̈efitry Masin̈y ndreky Farany Masin̈y tamy tempoly tao. Sefondro maramila aby io baka tio nivolan̈a: ‘Zanaka Zan̈ahary ankitin̈y izy.’