Acakulungwa ŵambopesi ŵamjigalile Yesu kunyumba ja Pilato. Kweleko Pilato ŵawusisye jemanjajo kuti, ‘Ana munduju alemwisye cici?’ Ni jemanjajo ŵatite, ‘Jwalakwe akuti ali mwenye!’ Kaneko Pilato ŵam’wusisye Yesu kuti, “Ana mmweji mli Mwenye jwa Ayuda?” Yesu ŵajanjile kuti, “Ucimwene wangu nganuŵa wakutyocela pacilambo capasi.”

Kaneko Pilato ŵamtumisye Yesu kwa Helodi juŵaliji jwakulamulila mu upande wa Galileya kuti akalole naga pana ligongo lililyose lyakumjimbila magambo Yesu. Nambo Helodi nganampata ni cakulemwa cilicose, ni ŵamtumisyesoni kwa Pilato. Kaneko Pilato ŵasalile ŵanduwo kuti, ‘Helodi ni une ngatukupata ligongo lililyose mwa munduju. Cingambe kumgopola.’ Nambo likuga lya ŵandu lila lyagumisile kuti, ‘Awulajidwe! Awulajidwe!’ M’yoyo asilikali ŵala ŵamkwapwile Yesu ni cikwapu, kumsunila mata soni ŵamputile ni magasa. Jemanjajo ŵapanganyisye cisoti ca miŵa ni kum’weca mumtwe ni ŵaŵecete maloŵe gakumnyosya kuti, ‘Moni, Mwenye jwa Ayuda.’ Pilato ŵalisalilesoni likuga lya ŵanduwo kuti, ‘Une pangali cakulemwa cilicose cangucipata mwa munduju.’ Nambo ŵandu ŵala ŵagumisile kuti, ‘Akomeledwe pacitela jwelejo!’ M’yoyo Pilato ŵampelece Yesu kwa jemanjajo kuti akam’wulaje.

Jemanjajo ŵamjigele Yesu ni kwawula najo ku malo gakolanjidwa Gologota. Kweleko ŵamkomele pacitela, kaneko ŵacisimice. Yesu ŵapopesile kuti, ‘Atati, ŵakululucile jemanjaji, ligongo ngakumanyilila cakutenda.’ Nambo ŵandu ŵala ŵamnyosyaga Yesu kuti, ‘Naga mmwejo mli Mwanace jwa Mlungu, mtuluce pacitelapo! Mlikulupusye jika.’

Jumo mwa ŵandu ŵaŵakomeledwe yalumo ni Yesu jŵatite, “Akangumbucile pacakajinjile mu Ucimwene wawo.” Yesu ŵamsimicisye mundujo kuti, “Timciŵa ni une m’Paladaiso.” Ndaŵi ja musi, kwatendekwe cipi kwa maawala gatatu pacilambo cosope. Ŵakulijiganya ŵane ŵa Yesu yalumo ni Maliya, mamagwe Yesu, ŵajimi ciŵandika pacitela paŵamkomele Yesu. Yesu ŵamsalile Yohane kuti amsamalileje Maliya mpela mamagwe.

Pambesi pakwe Yesu ŵatite, “Ngwanilisye lisosa lyawo!” Kaneko jwakotimisye mtwe ni jwapumasice kakumalisya. Pandaŵi jeleji kwatendekwe cisicinya camacili mnope. Soni m’nyumba ja Mlungu, cinguwo cacagaŵanyaga cipinda Ceswela ni cipinda Ceswela Mnope, capapwice  pasikati. Jwamkulungwa jwa asilikali jwatite, ‘Yisyene, aju ŵaliji Mwanace jwa Mlungu.’