U nojchiloʼob le sacerdoteʼoboʼ tu bisoʼob Jesús tu palacio le gobernadoroʼ. Teʼeloʼ Pilatoeʼ tu kʼáatajtiʼob: ‹¿Baʼaxten táan a takikeʼex u pool le máakaʼ?›. Letiʼobeʼ tu yaʼaloʼob: ‹Tumen táan u yaʼalikeʼ letiʼeʼ juntúul rey›. Pilatoeʼ tu kʼáataj tiʼ Jesús: ‹¿Teech wa u rey le judíoʼoboʼ?›. Jesuseʼ tu núukaj: ‹In Reinoeʼ maʼ yóokʼol kaabiliʼ›.

Ka tsʼoʼokeʼ Pilatoeʼ tu túuxtaj Jesús yiknal Herodes, u gobernanteil Galilea, utiaʼal u yilik wa yaan baʼax oʼolal u takik u pool. Herodeseʼ tu yilaj mix baʼal kʼaas u beetmaj Jesús, le oʼolal tu kaʼa túuxtaj yiknal Pilato. Pilato túuneʼ tu yaʼalaj tiʼ le máakoʼoboʼ: ‹Mix Herodes, mix teen ilik wa yaan baʼax kʼaas u beetmaj. Yaan in jáalkʼabtik›. Chéen baʼaleʼ le máakoʼoboʼ joʼopʼ u yawtikoʼob: ‹¡Kíimse! ¡Kíims le máakaʼ!›. Le soldadoʼoboʼ tu jaʼajatsʼoʼob, tu túuboʼob yéetel tu loxoʼob Jesús. Tsʼoʼoleʼ tu tsʼáajoʼob xan tu pool junpʼéel corona beetaʼan yéetel kʼiʼixeʼ ka joʼopʼ u burlarkoʼob: ‹¿Bix sáaschajik tiʼ u rey le judíoʼoboʼ?›. Pilatoeʼ tu kaʼa aʼalaj tiʼ le máakoʼoboʼ: ‹Teneʼ maʼ tin wilik wa yaan baʼax kʼaas u beetmaj le máakaʼ›. Chéen baʼaleʼ letiʼobeʼ joʼopʼ u yawtikoʼob: ‹¡Baʼajak tiʼ cheʼ!›. Le oʼolal Pilatoeʼ tu kʼubaj Jesús utiaʼal ka kíimsaʼak.

Le soldadoʼoboʼ tu bisoʼob Jesús tiʼ junpʼéel lugar ku kʼaabaʼtik Gólgota. Tu bajoʼob tiʼ junpʼéel cheʼeʼ ka tu pʼatoʼob chʼuytaliʼ. Jesús túuneʼ orarnaj tiʼ Jéeoba: ‹In Yuum, perdonartoʼob tumen maʼ u yojloʼob baʼax ku beetkoʼobiʼ›. Le máakoʼoboʼ joʼopʼ u burlarkoʼob Jesús, ka tu yaʼaloʼobtiʼ: ‹Wa u Paalech Dioseʼ, éemkech teʼ cheʼoʼ, salvartaba›.

Juntúul tiʼ le kʼasaʼan máakoʼob chʼuykíintaʼan tu tséel Jesusoʼ, tu yaʼalajtiʼ: ‹Kʼaʼajsen ken ookkech ta Reino›. Jesuseʼ tu yaʼalajtiʼ: ‹Yaan a wantal tin wéetel teʼ Paraísooʼ›. Teʼ tarde jeʼeloʼ chéen ka téek éeʼjochʼeʼenchaji, lelaʼ xáanchaj óoxpʼéel horaʼob. Yaan tiʼ le disipuloʼoboʼ pʼáatoʼob waʼatal náatsʼ tiʼ le cheʼ tuʼux tsʼaʼab Jesusoʼ, teʼeloʼ tiaʼan xan María, u maama Jesusiʼ. Letiʼeʼ tu yaʼalaj tiʼ Juan ka u kanáant María, bey jeʼex u maamaeʼ.

Tu tsʼookeʼ Jesuseʼ tu yaʼalaj: ‹¡Tsʼoʼok u béeychajal tuláakal!›. Tu chinaj u pooleʼ ka xuʼul u chʼaʼik u yiikʼ. Teʼ súutukoʼ tu tíituba le luʼumoʼ. U cortinail le templo jatsik le Kiliʼich Kúuchil tiʼ le Sen Kiliʼich Kúuchiloʼ  jóokʼ kaʼa jaats tiʼ. Juntúul tiʼ u nojchil le soldadoʼoboʼ, tu yaʼalaj: ‹Jaaj bakáan, le máakaʼ u Paal Dios›.