Sacerdotes goynéyibu Jesús lainy palacio xtuny Pilato né Pilato gonabdiitz layibu: «¿Xigony sitnéto láabu reʼ?». Layibu cuapyibu: «¡Nábu que nacbu rey!». Pilato gonabdiitz Jesús: «¿Naclo rey xtuny buñ judíos la?». Jesús cuapy láabu: «Gobierno xtuni diti nacni de gudxliogoxreʼ».

Después Pilato bixelbu Jesús ronoʼ Herodes, ni buny mandary gudx Galilea, par nabiʼ Herodes pu caché Jesús. Herodes bibiʼ que Jesús diti buny ni toib galkié por ngú bidxiguetbu Jesús ronoʼ Pilato. Ór cú Pilato gochbu buñ: «Herodes né naʼ raibydo que buñguieeu reʼ diti buny ni toib cós mal. Por ngú guislaʼya láabu». Per buñ bicaʼ rudx: «¡Bigaity láabu! ¡Bigaity láabu!». Soldad godinyibu Jesús né toib doʼ, bichixunyibu né bunynaayibu Jesús. Cuaʼyibu toib corona ni nap gúch né goloʼyibu láani guic Jesús né bixiichyibu Jesús scareʼ: «¡Rey xtuny judíos!». Pilato gochbu buñ stoib: «Buñguieeu reʼ diti buny ni toib galkié». Per layibu bicaʼyibu rudx: «¡Bicaʼ láabu ló yac!». Por ngú, Pilato bunycuentbu Jesús ladxña guirá buñcu par nagaity láabu.

Ór cú goynéyibu Jesús toib lagary ni góc laa Gólgota. Bicaʼyibu Jesús ló toib yac né cú bisianyibu Jesús. Jesús gonabbu lóo Jehová ndeʼ: «Bixiosa, bituidy xcalkiéyibu scásiʼ portín diti nanyibu ni cayonyibu». Buñ bixiichyibu Jesús né goniʼyibu: «¡Pal nigolú naclo Xiin Dios bietj ló yac nadopca né bilaa looyca!».

Toibtica buñ mal ni golxigaʼ cueʼ Jesús goniʼ: «Bisetnaladx naʼ órni guioʼlo ló Gobierno xtunylo». Jesús biduidy xtiitz láabu: «Sioʼlo né naʼ lainy Lagary mózcu». Godzúcu góc nacay tzón ór. Tipnés xpiin Jesús biaʼanyibu gahxca ronoʼ yac ro golxigaʼ Jesús, dada María, xinaʼ Jesús goyoʼ cú. Láabu gochbu Juan ñan xinaʼbu xomodca ñan Juan xinaʼ.

Órni mápa mer gaity Jesús, goniʼbu: «¡Ma góc cumplirni!». Golxigaʼ guicbu né godobladxbu, órcuca godudy toib xo rodann.  Dada birés tlaʼ lairy ni bitzoo Santo né Santísimo. Ór cú toib soldad goniʼ: «Ndeʼ nigolú góc Xiin Dios».